وزیراعظم شہباز شریف نال یو اے ای دے ’’سجوانی گروپ‘‘ دے وفد دی ملاقات، پاکستان دی ڈیجیٹل معیشت اچ اماراتی سرمایہ کاراں دی ودھدی ہوئی دلچسپی دا خیر مقدم

اسلام آباد۔ 9 جنوری (اے پی پی) وزیراعظم محمد شہباز شریف پاکستان دی ڈیجیٹل معیشت اوچ متحدہ عرب امارات دے سرمایہ کاراں دی ودھدی ہوئی دلچسپی دا خیر مقدم کریندیں ہوئیں آکھیے جو پاکستان تے متحدہ عرب امارات وچال پراݨے برادرانہ تعلقات ٻئے موثر معاشی تعاون تے سرمایہ کاری دی پاسے ودھدے پئن۔ وزیراعظم آفس دے میڈیا ونگ توں جاری بیان دے مطابق وزیراعظم نال متحدہ عرب امارات دے مشہور بزنس گروپ ’’سجوانی گروپ‘‘ دے وفد جمے دے ݙینہہ ملاقات کیتی۔ وفد نال ڳالھ مہاڑ کریندیں ہوئیں وزیراعظم آکھیا جو پاکستان اتے متحدہ عرب امارات دے درمیان گہرے، پراݨے تے برادرانہ تعلقات قائم ہن جیہڑے آپسی اعتماد تے احترام تے مبنی ہن۔ انھاں آکھیا جو شیخ محمد بن زاید النہیان دے اڄوکے دورہِ پاکستان ݙوہیں ملکاں دی شراکت داری کوں ٻیا مضبوط کیتے۔ وزیراعظم ایں ڳالھ تے اطمینان ظاہر کیتا جو حالیہ اعلیٰ سطح دے رابطیاں نال نجی شعبیاں تے سرمایہ کاراں دے آپسی اعتماد اچ اضافہ تھئے۔ انھاں آکھیا جو حکومت آئی ٹی، ڈیجیٹل جدت، بلاک چین تے ٻیاں نویں ٹیکنالوجیز دے شعبیاں اچ “بزنس ٹو بزنس” (B2B) تعاون کوں خاص اہمیت ݙیندی اے۔ سجوانی گروپ دے وفد پاکستان اچ سرمایہ کاری تے معاشی شراکت داری دے موقعیاں تے ٻیا تعاون دا عزم ظاہر کیتا۔ وزیراعظم وفد دے اعزاز اچ ظہرانہ وی ݙتا۔