پی ایس ایل اچ 2 نویاں ٹیماں دی شمولیت نال گراس روٹ لیول تے کرکٹ دے فروغ تے نویں ٹیلنٹ کوں ابھرݨ اچ مدد ملسی، وزیراعظم

اسلام آباد۔ 9 جنوری (اے پی پی) وزیراعظم محمد شہباز شریف آکھیے جو پی ایس ایل (PSL) اچ ݙو نویاں ٹیماں دی شمولیت نال گراس روٹ دی سطح تے کرکٹ دے فروغ تے نویں ٹیلنٹ کوں ابھرݨ اچ مدد ملسی، اے ڳالھ خوش آئند اے جو بڈنگ (بولی) کیتے بین الاقوامی فرمز سامݨے آئیاں، ایں عمل نال پاکستان اچ ٻاہرلی سرمایہ کاری کوں فروغ ملیا، سمندر پار پاکستانیاں ہمیشہ ملکی ترقی وچ اہم کردار ادا کیتے۔ وزیراعظم آفس دے میڈیا ونگ دے مطابق وزیراعظم محمد شہباز شریف نال پی ایس ایل اچ ݙو نویاں ٹیماں دی بڈنگ جیتݨ آلی فرمز دے نمائندیاں ملاقات کیتی۔ نمائندیاں اچ ٹیم سیالکوٹ حاصل کرݨ آلی فرم ’’او-زیڈ ڈویلپر‘‘ دے حمزہ مجید تے ٹیم حیدرآباد حاصل کرݨ آلی فرم ’’ایف کے ایس‘‘ دے فواد سرور شامل ہن۔ ملاقات اچ وفاقی وزیر داخلہ محسن نقوی اتے وفاقی وزیر اطلاعات عطاء اللہ تارڑ وی موجود ہن۔ وزیراعظم ٹیم سیالکوٹ تے ٹیم حیدرآباد دے نمائندیاں کوں مبارکباد ݙتی اتے انھاں کیتے نیک خواہشات دا اظہار کیتا۔ وزیراعظم کامیاب بڈنگ دے عمل تے چیئرمین پی سی بی محسن نقوی تے پی سی بی مینجمنٹ کوں خراجِ تحسین پیش کیتا۔ وزیراعظم آکھیا جو پی ایس ایل دی نویاں ٹیماں کیتے بولی دا عمل ٹیلی ویژن تے براہِ راست نشر کیتا ڳیا جیہڑا ایندی شفافیت دا ثبوت اے۔ اے ݙو نویاں ٹیماں پی ایس ایل کیتے تازہ ہوا دا جھونکا ثابت تھیسن۔ وزیراعظم آکھیا جو اے ڳالھ ٻہوں خوش آئند اے جو انھاں ݙو ٹیماں دی بڈنگ کیتے بین الاقوامی فرمز سامݨے آئیاں، جیندے نال پاکستان اچ سرمایہ کاری ودھی اے۔