وزیراعظم شہباز شریف جواہرات اتے قیمتی پتھراں دے شعبے اچ اصلاحات بارے قومی پالیسی فریم ورک دی اصولی منظوری ݙے ݙتی، ملک اچ جیمز سٹونز دے ذخائر دا تخمینہ 450 ارب ڈالر اے، اجلاس اچ بریفنگ

اسلام آباد۔ 9 جنوری (اے پی پی) وزیراعظم محمد شہباز شریف جواہرات تے قیمتی پتھراں (جیمز سٹونز) دے شعبے دی اصلاحات تے اینکوں بین الاقوامی تقاضیاں دے مطابق بݨاوݨ کیتے قومی پالیسی فریم ورک دی اصولی منظوری ݙیندیں ہوئیں آکھیے جو پاکستان اچ جواہرات تے قیمتی پتھراں دے ٻہوں وݙے ذخائر موجود ہن، ترجیحی بنیاداں تے جیولاجیکل سروے نال ذخائر دے جغرافیے تے مالیت دا تعین کیتا ونڄے، پالیسی فریم ورک اچ ٻاہرلی سرمایہ کاری کیتے چنڳے ماحول دی فراہمی کوں اولین ترجیح ݙتی ونڄے۔ پاکستانی قیمتی پتھر پوری دنیا اچ آپݨے معیار پاروں مشہور ہن، سمگلنگ دے خاتمے تے قانونی طریقے نال برآمد (ایکسپورٹ) توں ارباں ڈالر زرمبادلہ دا حصول یقینی بݨیسوں۔ وزیراعظم آفس دے میڈیا ونگ دی طرفوں جاری بیان دے مطابق وزیراعظم محمد شہباز شریف دی صدارت اچ ملک اچ جواہرات تے قیمتی پتھراں دے ذخائر، شعبے دی اصلاحات، برآمدات اچ ودھارے اتے جدید ٹیکنالوجی دے نفاذ تے اعلیٰ سطح دا اجلاس تھیا۔ اجلاس اچ وفاقی وزراء اعظم نذیر تارڑ، علی پرویز ملک، وزیرِ مملکت بلال اظہر کیانی، معاونِ خصوصی ہارون اختر تے ٻئے اعلیٰ حکام شریک تھئے۔ اجلاس کوں پاکستان اچ قیمتی پتھراں دی استعداد، علاقائی تقابلی جائزہ، برآمدات اچ اضافے کیتے اقدامات اتے قومی پالیسی فریم ورک دے خدوخال تے نفاذ دی معینہ مدت دے ہدفاں تے تفصیلی بریفنگ ݙتی ڳئی۔ وزیراعظم ایں سال پالیسی فریم ورک اچ ݙتے ڳئے اقدامات تے عملدرآمد کوں یقینی بݨاوݨ تے ترجیحی بنیاداں تے جیولاجیکل سروے توں ذخائر دے جغرافیے تے مالیت دا تعین کرݨ دی ہدایت کیتی۔ وزیراعظم ہدایت کیتی جو ایں کم اچ تمام متعلقہ ادارے، صوبائی حکومتاں تے سٹیک ہولڈرز دی مشاورت یقینی بݨائی ونڄے، بین الاقوامی معیار دی لیبارٹریز تے سرٹیفیکشنز دے نفاذ کیتے فوری اقدامات کیتے ونڄن۔ وزیراعظم آکھیا جو ایں سال ملک اچ جیم سٹونز متعلق ݙو مثالی “سینٹرز آف ایکسیلینس” بݨائے ونڄن۔ انھاں آکھیا جو نجی کمپنیاں تے خاص طور تے نوجوان آنٹرپرینیورز دی ایں شعبے اچ حوصلہ افزائی کیتی ونڄے۔ وزیراعظم ہدایت کیتی جو بین الاقوامی شہرت یافتہ ماہرین دی مدد نال پالیسی فریم ورک تے عملدرآمد اچ آوݨ آلیاں رکاوٹاں کوں دور کیتا ونڄے۔ اجلاس کوں ݙسایا ڳیا جو پاکستان اچ جواہرات دے ذخائر دا محتاط تخمینہ 450 ارب ڈالر اے، ایں ویلھے 5 ہزار توں ودھ کمپنیاں ایں شعبے نال جڑیاں ہوئیاں ہن جیہڑیاں 30 توں ودھ قیمتی پتھراں دی پراسیسنگ تے کم کریندیاں پئن۔ پاکستان اچ پاتے ونڄݨ آلے پتھراں اچ زمرد، زبرجد، یاقوت، پکھراج تے نیلگوں زبرجد سرِ فہرست ہن۔ اجلاس کوں ٻٰا ݙسایا ڳیا جو 450 ارب ڈالر دے ذخائر دے مقابلے اچ پاکستان دی برآمدات صرف 5.8 ملین ڈالر سالانہ ہن۔ وزارتِ صنعت تے تجارت 5 سال اچ اصلاحات دے ذریعے ایں شعبے دی برآمدات کوں ہک ارب ڈالر تئیں پڄاوݨ دا ہدف رکھیے۔