کتاب یا خودنوشت دی تحریر اچ سچ تے حقیقت پسندی بنیادی اہمیت رکھیندی اے، مصنف تے اخلاقی ذمہ داری اے جو او تاریخ نال دیانتداری ورتے، سید یوسف رضا گیلانی

کراچی۔ 9 جنوری (اے پی پی) چیئرمین سینیٹ سید یوسف رضا گیلانی آکھیے جو کہیں وی کتاب یا خودنوشت دی تحریر اچ سچ تے حقیقت پسندی بنیادی اہمیت رکھیندی اے، کیوں جو مصنف تے اے اخلاقی ذمہ داری ہوندی اے جو او تاریخ نال دیانتداری نال پیش آوے۔ جمے دے ݙینہہ رکن قومی اسمبلی ڈاکٹر مرزا اختیار بیگ دی معاشی موضوعات تے مشتمل کتاب ’’معیشت اور پارلیمنٹ‘‘ دی کراچی اچ تھئی تقریبِ رونمائی اچ بطور مہمانِ خصوصی شرکت کریندیں ہوئیں انھاں آکھیا جو میں آپݨی کتاب ’’چاہِ یوسف سے صدا‘‘ دی تحریر دا آغاز قید دے دوران کیتا ہئی۔ انھاں آکھیا جو سفرنامہ لکھݨ سوکھا تھی سڳدے پر آپݨی زندگی کوں تاریخ دے تناظر اچ لکھݨ جرات تے مستقل مزاجی دا تقاضا کریندے۔ سید یوسف رضا گیلانی ایں ڳالھ تے زور ݙتا جو معیشت تے پارلیمنٹ دا آپسی تعلق ٻہوں ضروری اے اتے انھاں اچوں کہیں ہک کوں وی نظر انداز نہیں کیتا ونڄ سڳدا۔ انھاں آکھیا جو قومی مسئلیاں دا حل اجتماعی سوچ تے ڳالھ مہاڑ نال ای ممکن اے۔ انھاں ڈاکٹر مرزا اختیار بیگ کوں کتاب دی اشاعت تے مبارکباد ݙتی۔ ایں موقع تے ڈاکٹر مرزا اختیار بیگ ݙسایا جو اے انھاں دی یارہویں کتاب اے۔ تقریب اچ وزیراعظم آزاد کشمیر، گورنر خیبرپختونخوا فیصل کریم کنڈی تے ٻیاں اہم سیاسی تے علمی شخصیتاں وی شریک تھیاں۔