پاکستان منرلز انویسٹمنٹ فورم 2026 تیاریاں موثربݨاوݨ تے عالمی سطح تے شرکت یقینی بݨاوݨ کیتے پاکستانی سفیراں تے ہائی کمشنرز نال بریفنگ سیشن

اسلام آباد۔ 9 جنوری (اے پی پی) وفاقی وزیر پٹرولیم علی پرویز ملک پاکستان منرلز انویسٹمنٹ فورم 2026دی تیاریاں کوں مزید موثر بݨاوݨ تے عالمی سطح تے وݙی شرکت یقینی بݨاوݨ کیتے اہم غیر ملکی دارالحکومتاں وچ تعینات پاکستان دے سفیراں تے ہائی کمشنرز نال ہک بریفنگ سیشن کیتا۔ اے اجلاس ٻاہرلے ملک پاکستانی مشنز نال آن لائن تھیا جیندے وچ پٹرولیم ڈویژن دے سینئر افسراں تے سرکاری اداریں دے نمائندیں شرکت کیتی۔اجلاس وچ سفارتی رابطیں کوں قومی معاشی ترجیحات نال جوڑݨ تے PMIF 2026 کوں پاکستان دے معدنی و کان کنی شعبے وچ سرمایہ کاری کیتے ہک نمایاں عالمی پلیٹ فارم دے طور تے پیش کرݨ تے توجہ ݙتی ڳئی۔ وفاقی وزیر آکھیا جو اے فورم ہک قومی معاشی ترجیح دی حیثیت رکھیندے۔ انھاں سفیراں تے ہائی کمشنرز تے زور ݙتا جو او میزبان ملکاں دی مائننگ کمپنیاں، سرمایہ کاراں تے مالیاتی اداریں نال فعال رابطے کرن۔ وفاقی وزیر PMIF 2025 دی کامیابی دا ذکر کریندے ݙسایا جو پچھلے فورم وچ 50 توں ودھ ملکاں دے 5000 مندوبین شریک تھئے ہن تے 14 مفاہمتی یادداشتاں تے دستخط تھئے ہن۔ PMIF 2026 اسلام آباد وچ 8 توں 9 اپریل 2026 تئیں منعقد تھیسی، جیندے وچ جیم سٹون نمائش تے ریسورس لائبریری وی شامل ہوسی۔