اڄ قوم دہشت گردی دا جیڑھا خمیازہ بھوڳیندی پئی اے، اوندے پچھوں تحریکِ انتشار دا سیاسی ونگ اے، کالعدم ٹی ٹی پی بارے ڳالھ کریندے پی ٹی آئی آلیں دیاں زباناں لڑکھڑا ویندن، عطاء اللہ تارڑ

اسلام آباد۔ 9 جنوری (اے پی پی) وفاقی وزیر اطلاعات و نشریات عطاء اللہ تارڑ آکھیے جو اڄ قوم دہشت گردی دا جیڑھا خمیازہ بھوڳیندی پئی اے ، اوندے پچھوں تحریکِ انتشار دا سیاسی ونگ اے، کالعدم ٹی ٹی پی بارے ڳالھ کریندے پی ٹی آئی آلیں دیاں زباناں لڑکھڑا ویندن، ٹی ٹی پی پاکستان دی دشمن اے، چھیکڑی ساہ تئیں ایندا پیچھا کر تے اینکوں ختم کریسوں۔اے ڳالھ انہاں پی ٹی وی ہیڈ کوارٹرز وچ مسلم لیگ (ن) دے رہنما زاہد خان دے نال پریس کانفرنس آکھی ۔ وفاقی وزیر آکھیا جو سال 2025ء ہر لحاظ نال کامیابیاں دا سال ثابت تھیا، ایں سال پاکستان معرکہِ حق وچ فیصلہ کن کامیابی حاصل کیتی تے فیلڈ مارشل سید عاصم منیر دی قیادت وچ افواجِ پاکستان فتح دے جھنڈے لاتے۔ انھاں آکھیا جو معاشی محاذ تے وی ملک کوں کامیابیاں ملئن ۔ ہک ویلھا ہئی جݙݨ ملک ڈیفالٹ دے کنڈے تے ہئی، پر الحمدللہ اڄ پاکستان ابھردی ہوئی معیشت بݨدا پئے، سٹاک مارکیٹ نویاں بلندیاں کوں پڄ ڳئی اے جیندے نال تاجر برادری دا اعتماد ودھئے۔عطاء اللہ تارڑ آکھیا جو دسمبر دے مہینے وچ ترسیلاتِ زر 3.6 ارب ڈالر تئیں پڄ ڳیاں ہن جیڑھا 17 فیصد اضافہ اے۔ انھاں آکھیا جو وزیراعظم دے ٻاہرلے دوریں نال معیشت تے مثبت اثرات پوندے پئن، اڄ دنیا پاکستان کیتے ریڈ کارپٹ وچھیندی پئی اے جیڑھا ساݙے وقار دی علامت اے۔ پی ایس ایل دیاں نویاں ٹیماں دے آکشن بارے انھاں آکھیا جو اوورسیز پاکستانی پاکستان وچ سرمایہ کاری کرݨ چاہندن۔ انھاں خیبرپختونخوا حکومت تے تنقید کریندے آکھیا جو اتھاں دی حکومت دی سوچ محدود اے، او تریمتاں دی تذلیل کریندن پر جݙݨ ٹی ٹی پی دا ناں آندے تاں چپ تھی ویندن۔ انھاں آکھیا جو اے این پی دہشت گردی دے خلاف ٻہوں قربانیاں ݙتن پر پی ٹی آئی دہشت گردں کیتے نرم گوشہ رکھیندی اے تے انھاں کوں واپس گھن آتے وسایا ڳیا۔وفاقی وزیر آکھیا جو پنجاب وچ ترقی دا سفر جاری اے پر خیبرپختونخوا وچ گورننس زمین بوس تھی چکی اے۔ اُتھاں ہسپتالاں تے سکولاں دا حال خراب اے، 49 لکھ ٻال سکولاں توں ٻاہر ہن۔ انھاں آکھیا جو خیبرپختونخوا وچ ٹمبر، ٹوبیکو تے ڈرگ مافیا سرگرم اے جیندے پچھوں سیاسی عناصر ہن۔ انھاں مزید آکھیا جو دہشت گردی دے خلاف اے جنگ اساں جتسوں تے ملک کوں امن دا گہوارہ بݨیسوں۔ پی ٹی آئی نال مذاکرات بارے انھاں آکھیا جو وزیراعظم پیشکش کیتی اے پر او سنجیدہ کائنی تے ملک دی سالمیت دے خلاف بیانیہ جاری رکھی پئن۔