وزیرداخلہ محسن نقوی دی زیرِ صدارت اجلاس، جاڑے شہراں وچ پاݨی ݙیوݨ سانڳے دوتارا ڈیم کوں ݙو سال دے اندر مکمل کرݨ دی منظوری

اسلام آباد۔ 10 جنوری (اے پی پی) وزیرداخلہ محسن نقوی دی زیرِ صدارت اجلاس وچ جاڑے شہراں کوں پاݨی دی فراہمی ودھاوݨ کیتے مختصر تے طویل مدتی اقدامات دا جائزہ ڳھدا ڳیا۔ اسلام آباد وچ پاݨی دی ودھدی قلت نال نبٹݨ کیتے ہنگامی ایکشن پلان تے عمل درآمد کرݨ دا فیصلہ کیتا ڳئے۔ اجلاس وچ وزیرِ مملکت داخلہ طلال چوہدری، وزیراعظم دے مشیر سید توقیر شاہ، وزارتِ داخلہ، سی ڈی اے، واپڈا تے راولپنڈی انتظامیہ دے اعلیٰ حکام شریک تھئے۔ اجلاس وچ پاݨی ذخیرہ کرݨ تے تقسیم دے نظام کوں مضبوط بݨاوݨ کیتے کئی تجویزاں دا جائزہ ڳھدا ڳیا۔وفاقی وزیرداخلہ محسن نقوی ایں موقع تے آکھیا جو کیپٹل ڈویلپمنٹ اتھارٹی (سی ڈی اے) پنجاب حکومت نال رل تے اسلام آباد تے راولپنڈی دی پاݨی دی لمبی مدت دیاں ضرورتاں پوریاں کرݨ کیتے سانجھے طور تے نویں ڈیم بݨیسی۔ اجلاس دے دوران حکام چھوٹے ڈیماں تے پاݨی دے ذخیرے بشمول چراہ، دوتارہ تے شاہدرہ ڈیم پراجیکٹس بارے منصوبہ بندی تے پیش رفت توں آگاہ کیتا۔ واپڈا تے سی ڈی اے حکام فزیبلٹی رپورٹاں، ٹائم لائنز تے مختلف آپشنز پیش کیتے جنھاں دا مقصد دارالحکومت دے شہری تے دیہاتی علاقیں وچ پاݨی دی فراہمی ودھاوݨ اے۔اجلاس وچ دوتارا ڈیم جیڑھا جو 110 ایم جی ڈی ذخیرہ کرݨ کیتے ڈیزائن کیتا ڳیا ہئی، کوں ݙو سال دے اندر مکمل کرݨ دی منظوری ݙتی ڳئی۔ وفاقی وزیر محسن نقوی پاݨی دی فراہمی دے موجودہ نظام وچ خامیاں تے تشویش دا اظہار کیتا تے پاݨی دی تقسیم دے نیٹ ورک کوں اوور ہال کرݨ دی ضرورت تے زور ݙتا۔ انھاں متعلقہ محکمیں کوں ہدایت کیتی جو نظام دیاں خامیاں دی وقتی نشاندہی کرن تے پاݨی دی بلاتعطل فراہمی یقینی بݨاوݨ کیتے موثر طریقہ اپناون۔ اسلام آباد دے رہائشیاں کوں پاݨی ݙیوݨ اپݨی “اولین ترجیح” قرار ݙیندے ہوئیں محسن نقوی حکام کوں پاݨی دی فوری ضرورتاں پوریاں کرݨ کیتے سارے دستیاب وسائل استعمال کریندے ہک مختصر مدتی منصوبے دے تحت فوری اقدامات دی ہدایت کیتی۔ انھاں پاݨی چوری تے کنکشن دے غلط استعمال دے خلاف وی سخت کریک ڈاؤن دا حکم ݙتا۔ وزیر داخلہ پاݨی دی دستیابی تے فراہمی تے پیشرفت کوں تکھا کرݨ کیتے 10 ݙینھ دا ہک جامع روڈ میپ منڳیا ۔ اجلاس وچ سیکرٹری داخلہ، چیئرمین سی ڈی اے، کمشنر راولپنڈی تے ٻئے اعلیٰ حکام شریک تھئے۔