بزنس کمیونٹی معیشت وچ ریڑھ دی ہݙی دی حیثیت رکھیندی اے، چیئرمین نیب

اسلام آباد۔ 10 جنوری (اے پی پی) چیئرمین قومی احتساب بیورو (نیب) لیفٹیننٹ جنرل (ر) نذیر احمد ایں ڳالھ تے زور ݙتے جو تاجر برادری ملکی معیشت دا اصل انجݨ اے تے تاجراں و صنعتکاراں کوں پیش آوݨ آلے مسئلیں دا حل نیب دی اولین ترجیح اے۔ انھاں آکھیا جو نیب کاروبار دوست ماحول کوں ودھارا ݙیوݨ کیتے پوری طرح پرعزم اے جیڑھا کاروباری اداریں دی ترقی تے قومی معیشت وچ موثر کردار ادا کریندے۔اے ڳالھ انہاں اسلام آباد چیمبر آف کامرس اینڈ انڈسٹری (آئی سی سی آئی) دے صدر سردار طاہر محمود نال ڳالھ مہاڑ کریندے آکھی جنھاں نیب ہیڈ کوارٹرز وچ انھاں نال ملاقات کیتی۔ آئی سی سی آئی ولوں جاری اعلامیہ موجب چیئرمین نیب آکھیا جو بیورو پورے معاشرے وچ احتساب، شفافیت تے سالمیت دے کلچر کوں ودھاوݨ کیتے عوامی آگاہی مہم تے متعلقہ اداریں نال نیڑٖ رابطے وچ مصروف اے۔ انھاں ایں ڳالھ تے زور ݙتا جو نیب ہک وݙے تے مستقبل دے حوالے نال نقطہ نظر تے عمل کریندا پئے، جیندے وچ سزا دے نال نال روک تھام تے اخلاقی اقدار کوں مضبوط بݨاوݨ تے وی زور ݙتا ویندا پئے۔ چیئرمین نیب یقین ݙوایا جو او وقتی اسلام آباد چیمبر دا دورہ کریسن تاں جو تاجر برادری نال ڳالھ مہاڑ کرتے سانجھا اعتماد ودھایا ونڄ سڳے۔