اسلام آباد۔ 11 جنوری (اے پی پی) چیئرمین سینیٹ سید یوسف رضا گیلانی اسلام آباد دے سیکٹر جی سیون وچ شادی دی تقریب دے دوران گیس سلنڈر دھماکے دے المناک واقعے وچ قیمتی جانی ضیان تے ٻہوں ݙکھ تے افسوس دا اظہار کیتے۔ ایں افسوسناک حادثے دے نتیجے وچ نویں پرنیجے جوڑے سودھے 6 بندے جاں بحق تھی ڳئن، جیندے تے پورے علاقے وچ سوڳ دی فضا اے۔سینیٹ سیکرٹریٹ میڈیا …
چیئرمین سینیٹ سید یوسف رضا گیلانی دا اسلام آباد وچ گیس سلنڈر دھماکے وچ قیمتی جانی ضیان تے اظہارِ افسوس
مزید خبراں
اسلام آباد۔ 11 جنوری (اے پی پی) چیئرمین سینیٹ سید یوسف رضا گیلانی اسلام آباد دے سیکٹر جی سیون وچ شادی دی تقریب دے دوران گیس سلنڈر دھماکے دے المناک واقعے وچ قیمتی جانی ضیان تے ٻہوں ݙکھ تے افسوس دا اظہار کیتے۔ ایں افسوسناک حادثے دے نتیجے وچ نویں پرنیجے جوڑے سودھے 6 بندے جاں بحق تھی ڳئن، جیندے تے پورے علاقے وچ سوڳ دی فضا اے۔سینیٹ سیکرٹریٹ میڈیا ڈائریکٹوریٹ توں جاری بیان وچ چیئرمین سینیٹ قیمتی انسانی جاناں دے ضیان تے ݙکھ تے افسوس کریندے جاں بحق تھیوݨ آلیں دے لواحقین نال تعزیت کیتی تے انھاں کیتے صبرِ جمیل دی دعا کیتی۔ انھاں آکھیا جو اے ہک ٻہوں دلخراش واقعہ اے جیندے وچ کئی خانداناں دیاں خوشیاں ماتم وچ بدل ڳیاں۔ سید یوسف رضا گیلانی آکھیا جو گیس سلنڈر دھماکیں دے واقعات ٻہوں تشویشناک ہن، ایجھے واقعات ایں ڳالھ دا تقاضا کریندن جو متعلقہ ادارے اپݨی ذمہ واریاں سنجیدگی نال نبھاون تے حفاظتی اقدامات کوں یقینی بݨاون۔ انھاں زور ݙتا جو گیس سلنڈرز دے غیر محفوظ استعمال کوں روکݨ کیتے موثر حکمتِ عملی اپنائی ونڄے تے عوام وچ شعور پیدا کیتا ونڄے تاں جو مستقبل وچ ایجھے حادثیں توں بچیا ونڄ سڳے
