وزیراعظم شہباز شریف دا جامعہ اشرفیہ لاہور دا دورہ، مولانا فضل الرحیم اشرفی دے انتقال تے تعزیت

لاہور۔ 11 جنوری (اے پی پی)وزیراعظم محمد شہباز شریف جامعہ اشرفیہ لاہور دے مہتمم اعلیٰ مولانا فضل الرحیم اشرفی مرحوم دے انتقال تے تعزیت کیتے جامعہ دا دورہ کیتا تے منتظمین و مرحوم دے عزیز و اقارب نال اظہارِ تعزیت کیتا۔وزیراعظم دفتر دے میڈیا ونگ توں جاری بیان موجب وزیراعظم موجودہ مہتمم اعلیٰ مولانا قاری ارشد عبید نال مولانا فضل الرحیم اشرفی (سابقہ مہتمم اعلیٰ جامعہ اشرفیہ لاہور) دی وفات تے دلی تعزیت دا اظہار کیتا۔ نائب مہتمم اعلیٰ حافظ اسد عبید، نائب مہتمم و مرحوم مولانا فضل الرحیم اشرفی دے صاحبزادے زبیر حسن تے ناظم اعلیٰ قاری مولانا اویس حسن وی ایں موقع تے موجود ہن۔ وزیراعظم مرحوم دے درجات دی بلندی کیتے فاتحہ خوانی تے دعا کیتی۔وزیراعظم مرحوم دی خدمات کوں خراجِ عقیدت پیش کریندے آکھیا جو مرحوم مولانا فضل الرحیم اشرفی دی اسلام سانڳے خدمات کوں رہندی دنیا تئیں عالمِ اسلام وچ قدر دی نگاہ نال ݙٹھا ویسی۔ وزیراعظم اوں ویلھے کوں یاد کیتا جݙاں او اپݨے والد میاں محمد شریف دے نال جامعہ اشرفیہ لاہور وچ ہک لمبے عرصے تئیں نمازِ جمعہ دی ادائیگی کیتے مسلسل حاضر تھیندے رہیے۔ انھاں آکھیا جو جامعہ اشرفیہ ہمیشہ امتِ مسلمہ کوں جوڑݨ دا کردار ادا کیتے جیڑھا جو ہر لحاظ نال تعریف دے لائق اے۔ دورے دے دوران سپیکر قومی اسمبلی سردار ایاز صادق، وفاقی وزیر اطلاعات و نشریات عطاء اللہ تارڑ تے معاونِ خصوصی طلحہ برکی وی وزیراعظم دے رلے ہن۔