جنوبی لبنان تے اسرائیلی حملے

بیروت۔ 12 جنوری (اے پی پی) اسرائیلی فوج گزریل ݙینہہ ݙوجھی واری جنوبی لبنان اچ حزب اللہ دے انھاں ٹھکاݨیاں تے حملے کیتن جنھاں کوں انھاں “دہشت گرد انفراسٹرکچر” قرار ݙتے۔ اردو نیوز اسرائیلی فوج دے ترجمان اویچائے ادرعی دے سوشل میڈیا پلیٹ فارم “ایکس” تے جاری بیان دے حوالے نال ݙسایا جو فوج ایں ویلھے جاری فوجی آپریشنز دے فریم ورک دے تحت جنوبی لبنان دے مختلف علاقیاں اچ کئی جہیں  تے حملے کریندی پئی اے، تاہم انھاں اہداف دی نوعیت یا بمباری دے نتیجے بارے ٻئی تفصیل نئی ݙتی۔ انھاں ہک ٻئی ٹویٹ اچ آکھیا جو فوج جنوبی لبنان دے علاقے بنت جبیل اچ حزب اللہ دے ہک رکن کوں نشانہ بݨائے۔ ایں دوران العربیہ دی نامہ نگار فضائی حملے اچ حزب اللہ دے ہک رکن دے ہلاک تھیوݨ دی اطلاع ݙتی اے۔ ایندے توں پہلے اسرائیل جنوبی لبنان دے مختلف علاقیاں تے فضائی حملیاں دا ہک سلسلہ شروع کیتا جنھاں اچ وادی برغز، محمودیہ دا علاقہ، سجد تے عیشیہ بستی دے درمیان جبل ریحان دیاں پہاڑیاں تے القطرانی بستی دا چودھار شامل ہئی۔ اسرائیلی فوج دے ترجمان ایکس تے ہک پوسٹ دے ذریعے کفر حتا بستی دے رہائشیاں کوں فوری وارننگ وی جاری کیتی۔ انھاں آکھیا جو اسرائیلی فوج وستی اچ حزب اللہ نال تعلق رکھݨ آلے فوجی انفراسٹرکچر تے ولاحملہ کریسی تے آپݨی ٹویٹ نال ہک نقشہ وی لاتا جیندے نال ڄاہ دی نشاندہی کیتی۔ انھاں نقشے اچ لال رنگ نال نشان زدہ عمارتاں دے رہائشیاں تے زور ݙتا جو او اینکوں فوری خالی کر ݙیوݨ۔ اے فضائی حملے اوں ویلھے کیتے ڳئے جݙاں اسرائیل گزریل گھنٹیاں دے دوران لبنان دے کئی علاقیاں اچ حزب اللہ دے اہداف کوں نشانہ بݨاوݨ دا اعلان کیتا ہئی۔ یاد راہوے جو نومبر 2024ء توں نافذ العمل جنگ بندی دے معاہدے دے باوجود اسرائیل خاص طور تے جنوبی لبنان تے حملے جاری رکھی کھڑے اتے حزب اللہ تے آپݨی فوجی صلاحیتاں کوں ولا بحال کرݨ دا الزام لیندے۔ لبنانی فوج حال اچ جنوبی سرحد توں گھن تے لیطانی دریا تئیں پھیلے ہوئے علاقے توں حزب اللہ کوں غیر مسلح کرݨ دا کم مکمل کرݨ دا اعلان کیتے۔ اے اسلحہ صرف ریاست دے ہتھ اچ رکھݨ دے ہک سرکاری منصوبے دا حصہ اے۔ ٻئی پاسے اسرائیلی وزیراعظم بنجمن نیتن یاہو لبنانی حکومت دی کوششاں کوں حوصلہ افزا پر ناکافی قرار ݙتے۔