ٹانک اچ پولیس دی بکتر بند گاݙی تے آئی ای ڈی حملہ، ایس ایچ او سودھے 6 اہلکار شہید

پشاور۔ 12 جنوری (اے پی پی) ٹانک اچ پولیس بکتر بند تے آئی ای ڈی حملے اچ ایس ایچ او سودھے 6 اہلکار شہید تھی ڳئن۔ ڈی پی او ٹانک شبیر حسین شاہ دے مطابق خیبر پختونخوا اچ ٹانک دے علاقے گومل اچ پولیس دی بکتر بند گاݙی تے آئی ڈی بم حملہ کیتا ڳیا، اے دھماکہ ٹانک دے علاقے کوٹ ولی توں 25 کلومیٹر دے فاصلے تے پیش آیا، دھماکے دے نتیجے اچ پولیس دی بکتر بند گاݙی مکمل طور تے تباہ تھی ڳئی۔ ڈی پی او ٹانک دے مطابق دھماکے دے نتیجے اچ ایس ایچ او سودھے 6 پولیس اہلکار شہید تھی ڳئے، واقعے دی اطلاع ملدے ای ریسکیو 1122 دی ٹیماں جائے وقوعہ تے روانہ کیتی ڳیاں، جتھوں لاشاں تے زخمیاں کوں ہسپتال منتقل کیتا ویندا پئے۔ بکتر بند گاݙی گومل توں ٹانک آندی پئی ہئی، حملے آچ شہید تھیوݨ آلیاں اچ اسحاق ایس ایچ او، اے ایس آئی شیر عالم، شفیع، حضرت علی، احسان اللہ تے مجید ڈرائیور شامل ہن۔ سکیورٹی فورسز واقعے دی اطلاع ملدے ای موقع تے پڄ ڳیاں، علاقے کوں گھیرے اچ گھن گھدے اتے سرچ آپریشن شروع کر ݙتا ڳئے۔