دہشت گردی دے نظریات کھنڈاوݨ آلیں دا نہ اسلام نال کوئی تعلق اے، نہ پاکستان نال تے نہ ہی انسانیت نال، اسلام امن دا مذہب اے، اے پیغام گھر گھر پڄایا ویسے، عطاء اللہ تارڑ

اسلام آباد۔ 12 جنوری (اے پی پی) وفاقی وزیراطلاعات و نشریات عطاء اللہ تارڑ آکھیے جو دہشت گردی دے نظریات کھنڈاوݨ آلیں دا نہ اسلام نال کوئی تعلق اے، نہ پاکستان نال تے نہ ہی انسانیت نال، قومی پیغامِ امن کمیٹی دا مقصد امن دے پیغام کوں کھنڈوݨ اے، اسلام امن دا مذہب اے، اے پیغام گھر گھر پڄایا ویسے۔اے ڳالھ انہاں اتھاں قومی پیغامِ امن کمیٹی کانفرنس دی صدارت کریندے آکھی۔ ایں موقع تے پاکستان علماء کونسل دے چیئرمین حافظ طاہر محمود اشرفی سودھے ٻئے علماء کرام وی موجود ہن۔ وفاقی وزیر اطلاعات خطاب کریندے آکھیا جو قومی پیغامِ امن کمیٹی دا بنیادی مقصد ملک وچ امن دے پیغام کوں عام کرݨ تے ریاستِ پاکستان دے ہر شہری کوں احساس ݙیواوݨ اے جو اسلام سراسر امن دا مذہب اے تے انسانیت کیتے امن دا پیغام گھن تے آئے۔انھاں آکھیا جو دہشت گردی تے انتہا پسندی دے جیڑھے نظریات آئے ݙینھ کھنڈاوݨ دی کوشش کیتی ویندی اے، انھاں دا نہ اسلام نال کوئی تعلق اے، نہ پاکستان نال تے نہ ہی انسانیت نال۔ انھاں واضح کیتا جو ریاست تے قوم ایجھے گمراہ کن نظریات دا ݙٹ تے مقابلہ کریسن۔ انھاں آکھیا جو قومی پیغامِ امن کمیٹی دا پشاور دا دورہ ٻہوں فیدہ مند ثابت تھیسی جتھاں سارے مکاتبِ فکر دے علماء نال مشورہ کیتا ویسے  تے ایں ڳالھ کوں یقینی بݨایا ویسے جو اے پیغام گھر گھر پڄے جو دینِ اسلام امن دا مذہب اے تے اساں امن چاہندوں۔وفاقی وزیر آکھیا جو اسلام آباد کچہری دے واقعے وچ ملوث لوکاں تے انھاں دے ہینڈلرز کوں گرفتار کیتا ڳئے، انھاں توں ملݨ آلا مواد ایں ڳالھ دا ثبوت اے جو انھاں دا اسلام نال پرے تئیں کوئی تعلق کائنی۔ انھاں آکھیا جو فتنہ الہندوستان تے فتنہ الخوارج بھارت توں فنڈنگ گھن تے پاکستان وچ آتے دھماکے کریندن، اے کیڑھا اسلام اے؟ انھاں آکھیا جو افغان حکومت دے بھارت نال ول ول رابطے وی ہک سوالیہ نشان ہن۔ انھاں آکھیا جو وزیراعظم شہباز شریف دی قیادت تے فیلڈ مارشل سید عاصم منیر دے عزم دے تحت پوری قوم کٹھی اے تے اساں ہر صورت دہشت گردی دا خاتمہ کرݨا اے، ریاستِ پاکستان ایندا بھرپور تے فیصلہ کن مقابلہ کریسی۔عطاء اللہ تارڑ آکھیا جو انھاں دا تعلق ایجھے حلقے نال اے جتھاں تقریباً 70 ہزار اقلیتی ووٹر ہن جنھاں اعتماد کرتے انھاں کوں اسمبلی تئیں پڄائے۔ انھاں عزم کیتا جو ریاستِ پاکستان ہر شہری کوں تحفظ دا احساس ݙویسی تے کہیں وی شرپسند کوں اپݨا بیانیہ ودھاوݨ دی اجازت نہ ݙتی ویسے۔