چیئرمین سینیٹ سید یوسف رضا گیلانی دی ٹانک وچ بکتر بند گاݙی تے حملے دی مذمت

اسلام آباد۔ 12 جنوری (اے پی پی) چیئرمین سینیٹ سید یوسف رضا گیلانی ضلع ٹانک دے گومل بازار روڈ تے بکتر بند گاݙی تے تھیوݨ آلے حملے دی سخت الفاظ وچ مذمت کیتی ۔چیئرمین سینیٹ ایں افسوسناک واقعے وچ تھاݨہ گومل دے ایڈیشنل ایس ایچ او اسحاق خان سودھے کئی پولیس اہلکاراں دی شہادت تے شہداء دے گھر آلیں نال دلی ہمدردی تے تعزیت کیتی۔ انھاں شہداء دی پیشہ ورانہ خدمات کوں خراجِ تحسین پیش کریندے آکھیا جو قوم پولیس دے بہادر سپوتاں دی قربانیاں کوں کݙاہیں نہ بھلسی۔ سید یوسف رضا گیلانی آکھیا جو دہشت گرد عناصر ایجھی بزدلانہ کارروائیاں نال قوم دے حوصلے جھکے نی کرسڳدے، پوری قوم دہشت گردی دے خلاف کٹھی اے تے سکیورٹی فورسز دے مونڈھے نال مونڈھا رلا تے کھڑی اے۔ چیئرمین سینیٹ دعا کیتی جو اللہ تعالیٰ شہداء کوں جنت الفردوس وچ اعلیٰ مقام عطا فرماوے تے لواحقین کوں صبرِ جمیل ݙیوے۔ انھاں زخمیاں دی وقتی صحت یابی دی دعا وی کیتی۔