مس انفارمیشن وݙا اتے سنگین چیلنج اے، ایں چیلنج نال نمٹݨ کیتے رل تے کم کرݨا ہوسی، عطاء اللہ تارڑ

اسلام آباد۔ 12 جنوری(اے پی پی) وفاقی وزیر اطلاعات و نشریات عطاء اللہ تارڑ آکھیے جو مس انفارمیشن (غلط معلومات) موجودہ دور دا سب توں وݙا اتے سنگین چیلنج اے، حکومت، میڈیا، تعلیمی اداریاں اتے سول سوسائٹی کوں ایں چیلنج نال نمٹݨ کیتے اپݨا کردار ادا کرݨا پوسی۔ اے ڳالھ انھاں آئی بی اے کراچی ولوں تھیوݨ آلے ڈائیلاگ” Can Facts Survive AI? Fighting Misinformation Together” نال ورچوئل خطاب اچ آکھی۔ وفاقی وزیر اطلاعات تقریب کراؤݨ تے آئی بی اے، سینٹر فار ایکسی لینس ان جرنلزم اتے یو این ڈی پی دا شکریہ ادا کیتا۔ انھاں آکھیا جو غلط معلومات ہݨ ہک ٻہوں وݙا چیلنج بݨ ڳئن، مصنوعی ذہانت (AI) دے ودھݨ دے بعد غلط معلومات نال نمٹݨ ٻہوں اوکھا تھی ڳئے، بطور وزیر اطلاعات انھاں ایں چیلنج کیتے کئی اقدامات کیتن جنھاں اچ پاکستان دے پہلے ڈیجیٹل کمیونیکیشن ڈیپارٹمنٹ دا قیام وی شامل اے جیہڑا ہݨ وزارت اطلاعات دا ملحقہ ادارہ اے۔ انھاں آکھیا جو وزارت دے سوشل میڈیا پلیٹ فارمز توں معلومات دی تصدیق کیتی ویندی اے اتے کوڑیاں خبراں تے باقاعدہ فیک انفارمیشن دا لیبل لایا ویندے۔ وفاقی وزیر آکھیا جو “آئی ویریفائی” قومی اتے عالمی سطح تے اپݨی ڄاہ ٻݨائی اے جیہڑا ہک حوصلہ افزا قدم اے۔ آئی بی اے ایں حوالے نال شاندار کم کیتے۔ انھاں آکھیا جو حکومت کلھے ایں چیلنج دا مقابلہ نئیں کر سڳدی، ایں سانگے میڈیا انڈسٹری تے وݙی ذمہ داری ہوندی اے۔ انھاں آکھیا جو مختلف سوشل میڈیا پلیٹ فارمز اے آئی نال بݨے مواد تے لیبل لاوݨا شروع کر ݙتے۔ انھاں آکھیا جو بھارت نال کشیدگی دے دوران وی پاکستان بیانیے دی جنگ ٻہوں موثر طریقے نال لڑی۔ وزیراعظم شہباز شریف مس انفارمیشن نال نمٹݨ کیتے مکمل مینڈیٹ ݙتے۔ انھاں پاکستان براڈکاسٹرز ایسوسی ایشن اتے اے پی این ایس کوں وی فعال کردار ادا کرݨ دا آکھیے۔ انھاں آکھیا جو ورلڈ اکنامک فورم دی رپورٹ دے مطابق غلط معلومات دنیا کیتے سب توں وݙا خطرہ ہین کیوں جو اے انتشار پیدا کر سڳدن۔ انھاں نوجوان نسل توں امید کیتی اتے آکھیے جو حقائق اے آئی دے باوجود زندہ رہ سڳدن۔ انھاں تمام سوشل میڈیا پلیٹ فارمز کوں آکھیا جو اے آئی کوں مثبت مقصد کیتے استعمال کیتا ونڄے اتے ایں مواد کوں واضح طور تے لیبل کیتا ونڄے۔ آخر اچ انھاں تقریب دے شرکاء دا شکریہ ادا کیتا اتے آکھیا جو او تیھکے ایں ادارے دا دورہ کریسن۔