شکرپڑیاں وچ جنگلی شہتوت دی سائنسی بنیاداں تے نشاندہی دے بعد کٹائی کیتی ڳئی، ماحولیاتی تحفظ حکومت دی سنجیدہ تے مستقل ترجیح اے، ڈاکٹر مصدق ملک

اسلام آباد۔ 13 جنوری (اے پی پی) وفاقی وزیر موسمیاتی تبدیلی و ماحولیاتی ہم آہنگی ڈاکٹر مصدق ملک آکھیے جو شکرپڑیاں وچ جنگلی شہتوت دی سائنسی بنیاداں تے نشاندہی دے بعد کٹائی کیتی ڳئی اے، پیپر ملبری پولن الرجی توں 30 توں 37 فیصد شہری متاثر تھیندن، ماحولیاتی تحفظ حکومت دی سنجیدہ تے مستقل ترجیح اے، ماحولیاتی خلاف ورزیاں تے جرمانے دی حد ودھاوݨ کیتے قانون وچ ترمیم کیتی ویندی پئی اے۔اے ڳالھ انہاں شکرپڑیاں دے فیلڈ وزٹ تے درختاں دی کٹائی تے شجرکاری دا جائزہ گھنݨ دے دوران کیتا۔ وفاقی وزیر ڈاکٹر مصدق ملک پیپر ملبری درختاں دی کٹائی تے مقامی درختاں دی ول شجرکاری دا معائنہ کیتا۔ انھاں آکھیا جو شکرپڑیاں وچ جنگلی شہتوت دی سائنسی بنیاداں تے نشاندہی دے بعد کٹائی کیتی ڳئی اے، جے کہیں مرحلے تے لاپرواہی یا قانون شکنی تھئی تاں کارروائی تھیسی۔ پیپر ملبری توں کھنڈݨ آلی پولن الرجی توں 30 توں 37 فیصد شہری متاثر تھیندن، پیپر ملبری دے اثرات تے بین الاقوامی سطح تے وی مطالعے تھیندے پئن۔انھاں آکھیا جو ایف نائن پارک وچ پبلک ہیئرنگ تھئی اے، ایندے منٹس منڳ گھدے ڳئن، اسلام آباد وچ جتھاں جتھاں پبلک ہیئرنگ تھئی اے انھاں دی مکمل تفصیلات منڳیاں ڳئن، پبلک ہیئرنگ عوام دا بنیادی حق اے۔ انھاں آکھیا جو ای پی اے (EPA) کوں درختاں دی ڳنتری تے ڈیٹا کٹھا کرݨ دی ہدایت ݙے ݙتی ڳئی اے، ای پی اے کوں واضح حکم اے جو سارے اقدامات قانون دے مطابق تھیسن۔ ای پی اے دے تقاضے پورے نہ کرݨ آلے کنسٹرکشن منصوبیں کوں شوکاز نوٹس جاری کیتے ویسن۔وفاقی وزیر آکھیا جو اساں اسلام آباد دے سارے متاثرہ مقامات دا دورہ کریسوں، درختاں دی کٹائی تے شجرکاری سی ڈی اے دی ذمہ داری اے، وزارت موسمیاتی تبدیلی دا بنیادی کم ماحولیاتی تحفظ اے، ہر کٹیے درخت دے بدلے سی ڈی اے ترے نویں درخت لیسی۔ وزارت موسمیاتی تبدیلی اسلام آباد وچ اضافی شجرکاری وی کریسی۔ ڈاکٹر مصدق ملک آکھیا جو ماحولیاتی خلاف ورزیاں تے جرمانے دی حد ودھاوݨ کیتے قانون وچ ترمیم کیتی ویندی پئی اے، ماحولیاتی جرمانے دی موجودہ حد 10 لکھ توں ودھائی ویسے۔ وفاقی وزیر آکھیا جو وزارتِ موسمیاتی تبدیلی دا درخت کٹݨ یا لاوݨ دائرہ اختیار کائنی پر نگرانی اساݙی ذمہ واری اے، اسلام آباد دے سبزے دے تحفظ تے کوئی سمجھوتہ نہ تھیسی۔