یونیورسٹی آف لندن پاکستان اچ تعلیم دے معیار کوں نویں جہت ݙتی، جدت، اختراع تے نویں ماڈیولز متعارف کرائے، وفاقی وزیر اطلاعات و نشریات عطاء اللہ تارڑ

اسلام آباد۔ 14 جنوری (اے پی پی) وفاقی وزیر برائے اطلاعات اتے نشریات عطاء اللہ تارڑ یونیورسٹی آف لندن دی پاکستان دے تعلیمی شعبے نال وابستگی تے خلوص کوں سراہندے ہوئیں آکھیے جو یونیورسٹی آف لندن پاکستان اچ تعلیم دے معیار کوں نویں جہت ݙتی، جدت، اختراع تے نویں ماڈیولز متعارف کرائے، مسلسل بہتری تے جدت کوں اپناوݨ یونیورسٹی آف لندن دی نمایاں سنڄاݨ اے۔اے ڳالھیں انھاں یونیورسٹی آف لندن دے اعلیٰ سطحی وفد دے اعزاز اچ تھیوݨ آلی تقریب نال خطاب کریندیں ہوئیں کیتا۔ تقریب اچ قائم مقام صدر و چیئرمین سینیٹ سید یوسف رضا گیلانی، جسٹس عائشہ ملک، پرو وائس چانسلر یونیورسٹی آف لندن فل آلمینڈنگر (Phil Allmendinger)، ڈائریکٹوریٹ آف لیگل ایجوکیشن دے ڈائریکٹر اسامہ ملک، سپریم کورٹ بار ایسوسی ایشن دے صدر ہارون رشید، رکن پنجاب اسمبلی آمنہ شیخ، برٹش کونسل دے کنٹری ڈائریکٹر جیمز ہیمپسن، یونیورسٹی آف لندن دے ریجنل ہیڈ برائے ساؤتھ ایشیا سعد وسیم، ممتاز قانون دان احمر بلال صوفی تے یونیورسٹی آف لندن دے تسلیم شدہ تعلیمی اداریاں دے نمائندے وی موجود ہن۔وفاقی وزیر اطلاعات و نشریات آکھیا جو او نہ صرف جامعہ لندن دے سابق طالبِ علم ہن بلکہ خود کوں جامعہ لندن دا اعزازی برانڈ ایمبیسیڈر وی سمجھدن۔ انھاں ایں موقع تے منتظمین دا شکریہ ادا کریندیں ہوئیں آکھیا جو انھاں کوں بارہا اینجھے باوقار تے علمی اجتماعات نال خطاب دا موقع ݙتا ڳئے جئیں تے او دلی طور تے شکر گزار ہن۔ انھاں پاکستان اچ تعلیم دے شعبے دے فروغ کیتے کیتیاں ونڄݨ آلیاں کوششاں کوں سراہندے ہوئیں آکھیا جو یونیورسٹی آف لندن دا اے علمی و تعلیمی پندھ کئی دہائیاں تے محیط اے جیہڑا ویلھے دے نال مزید وسعت تے استحکام اختیار کریندا ڳئے۔ عطاء اللہ تارڑ یونیورسٹی آف لندن دی پوری ٹیم کوں خراجِ تحسین پیش کریندیں ہوئیں آکھیے جو او نہ صرف پاکستان اچ تعلیم دے فروغ کیتے بھرپور کردار ادا کریندی پئی اے بلکہ جدت تے نویں تعلیمی ماڈیولز متعارف کراوݨ اچ وی پیش پیش اے۔ انھاں آکھیا جو گزشتہ دورے دے موقع تے ایل ایل بی پروگرام اچ ”انٹروڈکشن ٹو پاکستانی لا“ کوں بطور ماڈیول شامل کیتا ڳیا ہئی جیہڑا ہک اہم پیش رفت اے۔وفاقی وزیر اطلاعات عطاء اللہ تارڑ آکھیا جو او اج ایں اجتماع اچ ہک فخر کرݨ آلے سابق طالبِ علم دی حیثیت نال موجود ہن کیونجو جامعہ لندن دی اے ڈگری نہ صرف انھاں دی صلاحیتاں اچ اضافے دا باعث بݨی بلکہ وکالت توں گھن تے سول سروس تے ہݨ وزارت دے منصب تئیں مختلف پیشہ ورانہ مراحل اچ انھاں کوں عوام، ملک تے پاکستان اچ آپݨی کمیونٹی دی خدمت کیتے بھرپور معاونت فراہم کریندی رہی اے۔ وزیر اطلاعات عطاء اللہ تارڑ آکھیا جو یونیورسٹی آف لندن دے پرو وائس چانسلر فل آلمینڈنگر دا پاکستان اچ قیام مختصر رہیا پر انھاں کوں امید اے جو آئندہ او زیادہ وقت دے نال ولا پاکستان آسن تانجو پاکستان کوں ایندی اصل روح نال ݙیکھ سڳن کیونجوہ ݙیکھݨ یقین دی بنیاد ہوندے۔ چھیکڑ اچ انھاں آکھیا جو جامعہ لندن صدیاں تے محیط روایات تے تاریخ دی حامل اے، ایندے کیتے ہر ممکن خدمت تے تعاون کیتے ہمہ وقت تیار ہئیں۔