قائم مقام صدر نال اطالوی سفیر دی ملاقات، مختلف شعبیاں اچ تعاون ودھاوݨ تے ڳالھ مہاڑ

اسلام آباد۔ 14 جنوری (اے پی پی) قائم مقام صدر سید یوسف رضا گیلانی نال اطالوی سفیر مارلینا آرمَلّین ایوانِ صدر اچ ملاقات کیتی ۔ بدھ کوں ایوانِ صدر دے میڈیا ونگ دے مطابق ملاقات اچ پاکستان تے اٹلی وچال ݙو پاسہ تعلقات کوں ٻیا مستحکم بݨاوݨ تے مختلف شعبیاں اچ تعاون ودھاوݨ تے ڳالھ مہاڑ کیتی ڳئی۔ قائم مقام صدر آکھیا جو پاکستان تے اٹلی دے درمیان 75 سال توں زیادہ عرصے تے محیط سفارتی تعلقات قائم ہن جیہڑے دیرینہ دوستی تے اہم بین الاقوامی فورمز تے آپسی تعاون تے مبنی ہن۔ انھاں کثیرالجہتی پلیٹ فارمز تے اٹلی دی حمایت کوں سراہیا اتے اطالوی حکومت دا شکریہ ادا کریندیں ہوئیں آکھیا جو اٹلی دی حکومت 3 لکھ توں ودھ پاکستانی تارکینِ وطن دی میزبانی کریندی پئی اے۔ سید یوسف رضا گیلانی پاکستان وچ مختلف اطالوی کمپنیاں دی موجودگی بالخصوص ادویہ سازی، تیل و گیس تے ریلوے دے شعبیاں دا ذکر کیتا تے تجارت و سرمایہ کاری دے تعلقات کوں مزید وسعت ݙیوݨ اچ پاکستان دی دلچسپی دا اظہار کیتا۔ انھاں اٹلی ونڄݨ آلے پاکستانی شہریاں کیتے ویزا دے عمل کوں تیز کرݨ دی لوڑھ تے وی زور ݙتا اتے لیبر مائیگریشن پروگرام دے تحت ہنرمند کارکنوں دے کوٹے اچ اضافے دی خواہش ظاہر کیتی جیندے کیتے ݙوہاں ملکاں دے درمیان مفاہمتی یادداشت زیرِ تکمیل اے۔ اطالوی سفیر آکھیا جو اٹلی پاکستان دے نال آپݨی دیرینہ دوستی کوں قدر دی نگاہ نال ݙیکھدے اتے پاکستان انھاں ابتدائی ملکاں اچ شامل ہئی جنھاں نال اٹلی سفارتی تعلقات قائم کیتے۔ انھاں آکھیا جو 2025 اچ اٹلی 15,000 توں ودھ پاکستانی طلباء کوں ویزے جاری کیتے جنھاں کوں اطالوی یونیورسٹیاں اچ پوسٹ گریجویٹ تے پی ایچ ڈی پروگراماں اچ داخلہ ملیا۔ اٹلی اچ ہنرمند افرادی قوت دی ڳھٹکی خصوصاً سائنسی شعبیاں، آئی ٹی تے صحت دے شعبے دا حوالہ ݙیندے ہوئیں انھاں آکھیا جو اطالوی ادارے پاکستانی یونیورسٹیاں ولوں اطالوی زبان دے کورسز شروع کرݨ دے اقدامات دا خیرمقدم کریندن تانجو روزگار دے موقع بہتر بݨائے ونڄ سڳن۔ ملاقات اچ تعلیم، مائیگریشن، تجارت تے عوامی روابط سمیت مختلف شعبیاں اچ ݙو طرفہ تعاون کوں ٻیا ودھاوݨ دے عزم دا اعادہ کیتا ڳیا۔