وزیراعظم شہبازشریف دی صدارت اچ مجوزہ سول سروسز اصلاحات تے وزارتاں وچ کارکردگی دی جانچ دے نظام دی سفارشات دا جائزہ گھنݨ کیتے اجلاس

اسلام آباد۔ 14 جنوری (اے پی پی) وزیراعظم محمد شہباز شریف سول سروس کوں بین الاقوامی معیار نال ہم آہنگ کرݨ کیتے اصلاحات کوں ناگزیر قرار ݙیندے کارکردگی جانچݨ دا جامع تے موثر نظام وضع کرݨ کیتے سفارشات مرتب کرݨ دی ہدایت کیتی اے۔وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف دی زیرِ صدارت مجوزہ سول سروسز اصلاحات تے وزارتاں وچ کارکردگی دی جانچ دے نظام دی سفارشات دا جائزہ گھنݨ کیتے جائزہ اجلاس منعقد تھیا۔ وزیراعظم اجلاس نال خطاب کریندے آکھیا جو ملکی سول سروس کوں بین الاقوامی معیار تے عالمی سطح دی کارکردگی نال ہم آہنگ کرݨ کیتے اصلاحات ناگزیر ہن۔ انھاں وفاقی سیکرٹریز دی کارکردگی جانچݨ کیتے جامع تے موثرنظام دی سفارشات مرتب کرݨ دی ہدایت کیتی۔ وزیراعظم آکھیا جو چنڳی کارکردگی ݙکھاوݨ آلے افسراں دی تحسین سول سروسز دی مجموعی بہتری کیتے ٻہوں ضروری اے۔انھاں ہدایت کیتی جو متعلقہ کمیٹی سول سروس وچ ارتقائی تے موثر تے جامع اصلاحاتی سفارشات وقتی بݨاوے ۔افسراں دی کارکردگی دی جامع جانچ دی بنیاد تے انھاں دی ترقی، مالی فیدے تے ٻیاں مراعات دا نظام وضع کرݨ کیتے سفارشات مرتب کیتیاں ونڄن۔ انھاں آکھیا جو سول سروس وچ اصلاحات دا مقصد موثر عوامی خدمت تے سہولتاں ݙیوݨ دے ذریعے عوام دی زندگی وچ واضح بہتری کوں یقینی بݨاوݨ اے۔ معاشی آسودگی تے سماجی ہم آہنگی، ترقی و خوشحالی کیتے ہمہ جہت سول سروس اصلاحات حکومت دی اولین ترجیحات وچ شامل اے۔ انھاں ہدایت کیتی جو سول سروس دی مجوزہ اصلاحات وچ سول انتظامیہ، ساری سروسز تے گروپس دے سٹیک ہولڈرز نال بامعنی مشاورت کیتی ونڄے۔ انھاں آکھیا جو سول سروس کہیں وی ملک دی گورننس تے عوامی فلاح و بہبود دا بنیادی ڈھانچہ ہوندی اے ۔ افسراں دی کارکردگی تے قابلیت کوں دورِ حاضر دے عصری تقاضیں تے عالمی سطح دے معیار نال ہم آہنگ کرݨ کیتے خصوصی سفارشات مرتب کیتیاں ونڄن۔سول سروسز اصلاحات کیتے بݨائی ڳئی کمیٹی ایجھیاں سفارشات تجویز کرے جیڑھیاں قابلِ عمل، دیرپا تے موثر عوامی سہولت دا باعث بݨن۔ وزیراعظم سول سروسز اصلاحات تے کم کرݨ آلی کمیٹی کوں افسراں دی کارکردگی دی جامع جانچ دی بنیاد تے ترقی، مالی فیدے تے ٻئی سہولتاں دے نظام دی سفارشات مرتب کرݨ دی خصوصی ہدایات ݙتیاں۔ وزیراعظم مزید آکھیا جو حکومت دی اصلاحاتی تے عوام دی فلاح و بہبود تے مشتمل پالیسیاں دا ثمر عوام تئیں پڄاوݨ کیتے سول سروسز ہک بنیادی ڈھانچے دا کردار ادا کریندی اے۔ اجلاس وچ سول سروسز اصلاحات تے بݨائی ڳئی کمیٹی وزیراعظم کوں ہݨ تئیں دی مشاورت تے سفارشات تے بریفنگ ݙتی۔ اجلاس وچ نائب وزیراعظم تے وزیر خارجہ محمد اسحاق ڈار، وفاقی وزیرخزانہ محمد اورنگزیب، وفاقی وزیر منصوبہ بندی و ترقی احسن اقبال، وفاقی وزیرموسمیاتی تبدیلی مصدق ملک، وفاقی وزیر قانون اعظم نذیر تارڑ، وفاقی وزیر اقتصادی امور احد خان چیمہ، وزیراعظم دے معاون خصوصی ہارون اختر، سارے صوبیں دے چیف سیکرٹریز تے متعلقہ سرکاری عہدیداراں شرکت کیتی۔