مضبوط، منتخب تے مالی طور تے خودمختار مقامی حکومتاں جمہوریت کوں عملی تے موثر بݨاوݨ کیتے ناگزیرہن، قائم مقام صدر سید یوسف رضا گیلانی دا ڈیولوشن سمٹ 2026 دی اختتامی تقریب نال خطاب

اسلام آباد۔ 14 جنوری (اے پی پی)قائم مقام صدر سید یوسف رضا گیلانی مضبوط، منتخب تے مالی طور تے خودمختار مقامی حکومتاں کوں جمہوریت کوں عملی تے موثر بݨاوݨ کیتے ناگزیر قرار ݙیندے آکھیے جو ڈیولوشن قومی یکجہتی کیتے خطرہ کائنی بلکہ ایندی مضبوط ضمانت اے کیوں جو ایندے نال عوامی شرکت وچ اضافہ، شکایتاں دا وقتی ازالہ تے جمہوری اداریں تے عوام دا اعتماد مضبوط تھیندے۔ انھاں اے ڳالھ اتھاں ڈیولوشن سمٹ 2026 دی اختتامی تقریب نال خطاب کریندے آکھی۔قائم مقام صدرآکھیا جو انھاں کوں سمٹ نال خطاب دا موقع ملݨ تے خوشی اے ۔ انھاں ایں فورم کوں ہک اہم پلیٹ فارم قرار ݙتا جتھاں پارلیمنٹ دے ارکان، آئینی ماہرین، سرکاری منتظمین، ماہرینِ معیشت تے سول سوسائٹی دے نمائندے ایں ڳالھ تے سنجیدہ غور و فکر کیتے کٹھے تھئن جو پاکستان وچ اختیارات دی تلویں سطح تئیں منتقلی کوں کیویں پائیدار، موثر تے عوام دی ضرورتاں موجب بݨایا ونڄ سڳدے۔ سید یوسف رضا گیلانی آکھیا جو سول سروس دے ڈھانچے، مراعات تے ترقی دے نظام کوں ڈیولوشن دے تقاضیں نال ہم آہنگ کیتا ونڄݨا چاہیدے۔ انھاں پنجاب اسمبلی دے سپیکر تے پنجاب لوکل گورنمنٹ کاکس کوں ایں بامقصد سمٹ دے انعقاد تے خراجِ تحسین پیش کریندے آکھیا جو ڈیولوشن کوں محض ہک سیاسی نعرہ نہ سمجھیا ونڄے بلکہ ہک ایجھا آئینی نظام سمجھا ونڄے جینکوں قانون، وسائل تے مضبوط اداریں دی لوڑھ ہوندی اے۔انھاں زور ݙتا جو ڈیولوشن تے کوئی وی بامعنی ڳالھ مہاڑ آئین وچ درج کوآپریٹو فیڈرلزم دے جذبے دے تحت ہووݨی چاہیدی اے۔ انھاں اپݨے وزارتِ عظمیٰ دے دور دا حوالہ ݙیندے آکھیا جو اختیارات دی منتقلی میݙے سیاسی سفر دا مرکزی حصہ رہی اے ۔ انھاں آکھیا جو اٹھارویں ترمیم دے ذریعے تعلیم، صحت، زراعت تے سماجی بہبود جھیں اہم شعبے وفاق توں صوبیں کوں منتقل کر ݙتے ڳئن۔ قائم مقام صدر آکھیا جو ڈیولوشن قومی یکجہتی کیتے خطرہ کائنی بلکہ ایندی ضمانت اے کیوں جو ایندے نال عوامی شرکت ودھدی اے تے جمہوری اداریں تے اعتماد مضبوط تھیندے۔