وفاقی وزیر بورڈ آف انویسٹمنٹ قیصر احمد شیخ نال پاکستان وچ کینیڈا دے ہائی کمشنر طارق علی خان دی ملاقات

اسلام آباد۔ 14 جنوری (اے پی پی)وفاقی وزیر بورڈ آف انویسٹمنٹ قیصر احمد شیخ نال پاکستان وچ کینیڈا دے ہائی کمشنر طارق علی خان اہم ملاقات کیتی اے۔ ملاقات وچ وفاقی وزیر ثقافت اورنگزیب کھچی تے بورڈ آف انویسٹمنٹ دے سینئر حکام وی شرکت کیتی۔ وفاقی وزیر قیصر احمد شیخ کینیڈین وفد دا خیرمقدم کریندے ݙو طرفہ تجارت وچ ودھارے کوں خوش آئند قرارݙتا۔بورڈ آف انویسٹمنٹ موجب وفاقی وزیرقیصر احمد شیخ ملاقات اچ ڳالھ کریندے کینولا دی تجارت وچ کینیڈا دی نمایاں پیشرفت تے بریک تھرو دی تعریف کیتی ۔ ایں موقع تے پاکستان تے کینیڈا وچال تجارت تے سرمایہ کاری ودھاوݨ تے وی اتفاق کیتا ڳیا۔ وفاقی وزیرقیصر احمد شیخ انویسٹمنٹ، بزنس فسیلیٹیشن سینٹر، ریگولیٹری اصلاحات تے خصوصی اقتصادی زونز تے بریفنگ ݙتی۔ فریقین زراعت، معدنیات، مینوفیکچرنگ، ڈیجیٹلائزیشن تے گرین انرجی وچ سرمایہ کاری دے موقعیں تے ڳالھ مہاڑ کیتی ۔پاکستان-کینیڈا سرمایہ کاری معاہدے تے مذاکرات وقتی بحال کرݨ تے وی اتفاق کیتا ڳیا۔ وفاقی وزیر قیصر احمد شیخ آکھیا جو پاکستان سرمایہ کاری کیتے موزوں تے پُرکشش ملک اے، بورڈ آف انویسٹمنٹ پاکستان وچ پائیدار سرمایہ کاری دے ودھارے پُرعزم اے۔ ملاقات دے دوران وفاقی وزیرثقافت اورنگزیب کھچی ولوں پاکستان تے کینیڈا وچال ثقافتی تعاون ودھاوݨ تے زورݙتا ڳیا۔ کینیڈین ہائی کمشنر ولوں JCM Power دی پاکستان وچ سرمایہ کاری دے بارے وچ ݙسایا ڳیا۔