وزیراعظم دی قیادت وچ اصلاحات واضح سمت تے مقصد دے نال نافذ کیتیاں ویندیاں پئن، نائب وزیراعظم تے وزیر خارجہ اسحاق ڈار

اسلام آباد۔ 14 جنوری (اے پی پی) نائب وزیراعظم تے وزیر خارجہ سینیٹر محمد اسحاق ڈار پالیسیاں وچ تسلسل تے زور ݙیندے سارے متعلقہ فریقین توں آکھیے جو او معاشی استحکام دے حصول تے عالمی برادری وچ پاکستان دا نمایاں مقام بݨاوݨ کیتے مزید محنت کرن۔ نائب وزیراعظم اے ڳالھ اتھاں ”پاکستان پالیسی ڈائیلاگ“ نال بطور مہمانِ خصوصی خطاب کریندے آکھی ۔انھاں آکھیا جو موجودہ حکومت جݙݨ بھڄ دُھرک سنبھالی تاں اینکوں ہک شدید معاشی عدم توازن ورثے وچ ملیا جیندے تے واحد ترجیح پاکستان دے طویل المدتی مفادات کوں بݨایا ڳیا۔ انھاں آکھیا جو اوکھے فیصلے کیتے ڳئے تے سیاسی سوکھ کوں ھک پاسے رکھ تے ذمہ واری کوں ترجیح ݙتی ڳئی۔ انھاں آکھیا جو وزیراعظم محمد شہباز شریف دی قیادت وچ اصلاحات ہݨ واضح پاسے تے مقصد دے نال نافذ کیتیاں ویندیاں پئن تے پراݨی ناکامیاں کوں منظم انداز وچ دور کیتا ویندا پئے جیندے وچ وݙے سرکاری اداریں دی نجکاری وی شامل اے۔نائب وزیراعظم تے وزیرخارجہ نجکاری دے عمل بارے آکھیا جو کاروباری برادری دے سارے حلقیں وچ ایں ڳالھ تے اتفاق اے جو اے اولین ترجیحات وچ شامل ہووݨی چاہیدی اے۔ انھاں آکھیا جو ݙو ݙھاکیں توں ودھ عرصے بعد پی آئی اے دی نجکاری کامیابی نال مکمل کر ڳھدی ڳئی اے۔ نائب وزیراعظم آکھیا جو ایں عمل نال نہ صرف قومی ایئرلائن جدید خطوط تے استوار تھیسی بلکہ قومی خزانے تے پووݨ آلا مالی ٻوجھ وی گھٹ تھیسی۔ انھاں آکھیا جو ایں اقدام نال ملکی تے غیر ملکی سرمایہ کاراں دی بھرپور دلچسپی پیدا تھئی اے جیندے نال پاکستان دے نجکاری پروگرام تے اعتماد وچ ودھارا تھئے تے معاشی اصلاحات دے عمل کوں مزید تقویت ملی اے۔گردشی قرضے مکاوݨ بارے انھاں آکھیا جو حکومت ادائیگی دے نظام وچ نظم و ضبط نافذ کریندی پئی اے تاں جو توانائی دا شعبہ معاشی ترقی دا سہارا بݨے۔ رائٹ سائزنگ بارے انھاں آکھیا جو حکومت غیر ضروری اخراجات ختم کریندی پئی اے۔ 2023 دی صورتحال دا حوالہ ݙیندے انھاں آکھیا جو ایں ویلھے کاروبار جمود دا شکار ہئی پر ہݨ حالات بہتری آلے پاسے ویندے پئن۔ انھاں آکھیا جو مہانگ گھٹ تھی تے 5.6 فیصد (سی پی آئی) تے آڳئی اے تے پاکستان اسٹاک ایکسچینج نویں ریکارڈ قائم کیتن۔ انھاں آکھیا جو پاکستان معدنی وسائل نال مالا مال اے تے محتاط اندازے موجب انھاں دی مالیت چھی توں اٹھ کھرب ڈالر تئیں تھی سڳدی اے۔نائب وزیراعظم آکھیا جو پاکستان تے چین دی ہمہ موسمی اسٹریٹجک شراکت داری مزید مضبوط تھیندی پئی اے جیڑھی ݙوہیں ملکاں دے عوام کیتے طویل المدتی معاشی فیدیں دا باعث بݨسی۔ امریکہ، یورپ تے خلیجی ملکاں نال وی تعاون ودھایا ویندا پئے تاں جو پاکستان دی نیلی معیشت تے ایف ڈی آئی (FDI) حکمتِ عملی کوں تقویت ملے۔ انھاں آکھیا جو پاکستان دی ترقی گرین، ڈیجیٹل تے انسانی وسائل تے مبنی ہووݨی چاہیدی اے، جیڑھی پاکستان دی معاشی ریزیلینس کیتے ناگزیر اے۔