معاشی استحکام آ ڳئے، ہݨ ترقی دے اقدامات کریسوں، دہشت گردی دا مکمل صفایا کریسوں، معرکہ حق دے بعد ڄڳ اچ ساݙے جہازاں دی مانگ ودھ ڳئی اے، وزیراعظم محمد شہباز شریف

اسلام آباد۔ 14 جنوری(اے پی پی) وزیر اعظم محمد شہباز شریف آکھیے جو معاشی استحکام آ ڳئے، ہݨ ترقی کیتے اقدامات کریسوں، پاکستان خوشحالی دے سفر تے گامزن تھیسی، دہشت گردی دا مکمل صفایا کریسوں، معرکہ حق دے بعد دنیا وچ اساݙے طیاریاں دی مانگ ودھ ڳئی اے۔ انہاں اے ڳالھ اسلام آباد اچ وفاقی کابینہ دے اجلاس اچ الیندے آکھی۔ وزیراعظم آکھیا جو ورلڈ لبرٹی فنانشل دے نال مفاہمتی یادداشت تے دستخط خوش آئند ہن، ایں ایم او یو نال ملکی معیشت کوں فائدہ تھیسی اتے بین الاقوامی ٹرانزیکشن اچ سوکھ آسی۔ پاکستان تھوڑے عرصے اچ ایں حوالے نال ٻہوں وݙی پیش رفت کیتی اے، ہݨ ڈیجیٹل کرنسی اتے ڈیٹا سنٹر دے ذریعے ٹرانزیکشن ممکن تھیسی۔ وزیراعظم آکھیا جو ڈیجیٹل انفراسٹرکچر جیندی ٻہوں پہلے توں ضرورت ہئی ہݨ اوندا آغاز تھی ویسی۔ وزیراعظم پاکستان ایئر فورس کوں تیمور ویپن سسٹم اتے پاک بحریہ کوں ایل وائی 80 دے کامیاب تجربے تے مبارکباد ݙتی۔ انھاں آکھیا جو معرکہ حق اچ کامیابی دے بعد دنیا اچ اساݙے لڑاکا طیاریاں دی مانگ ودھ ڳئی اے، ٻہوں سارے ملک طیارے گھنݨ کیتے ڳالھ مہاڑ کریندے پئن۔ وزیراعظم دہشت گردی دے خلاف بلوچستان اتے خیبرپختونخوا اچ افواجِ پاکستان اتے قانون نافذ کرݨ والے اداریاں دی کامیابیاں کوں سراہیا۔ انھاں کابینہ کوں اپݨے دورہ کوئٹہ بارے ݙسایا جو این 25 شاہراہ (کراچی توں چمن) جیہڑی 850 کلومیٹر طویل اے، اوندا سنگِ بنیاد رکھ ݙتا ڳئے، اے منصوبہ ہک سال اچ مکمل تھیسی اتے وفاق ایںدے تے 400 ارب روپے خرچ کریسی۔ وزیراعظم ݙسایا جو بلوچستان اچ 75 ارب روپے دی لاگت نال کساناں کیتے زرعی پیکیج دا منصوبہ وی مکمل تھی چکیے۔ سولر پینلز دے استعمال نال بجلی چوری ختم تھی ڳئی اے اتے کساناں کوں پاݨی ملدا پئے۔ انھاں ہک لکھ لیپ ٹاپس ونݙݨ اتے ہزاراں طلباء کیتے وظائف دا وی ݙسایا۔