سی پیک 2.0 دے تحت صنعتی تعاون، برآمدات دے فروغ تے جدید ٹیکنالوجی دی منتقلی تے خصوصی توجہ ݙتی ویندی پئی اے، وفاقی وزیر سرمایہ کاری بورڈ

اسلام آباد۔ 16 جنوری (اے پی پی) وفاقی وزیر سرمایہ کاری بورڈ قیصر احمد شیخ جمعہ کوں اجلاس اچ سی پیک فیز-II دے تحت صنعتی تعاون دا تفصیلی جائزہ گھدا۔ اجلاس اچ خصوصی اقتصادی زونز (SEZs) تے مبنی صنعتی ترقی، پاکستان-چین صنعتی شراکت داری تے سرمایہ کاری دے فروغ نال متعلق معاملیاں تے بریفنگ ݙتی ڳئی۔ سرمایہ کاری بورڈ توں جاری بیان دے مطابق وفاقی وزیر آکھیا جو سی پیک فیز-II وچ پاکستان-چین B2B تعاون کوں مرکزی حیثیت حاصل اے، جیندے ذریعے صنعتی پیداوار، برآمدات اچ اضافہ تے ٹیکنالوجی دی منتقلی کوں فروغ ݙتا ویندا پئے۔ اجلاس کوں ݙسایا ڳیا جو خصوصی اقتصادی زونز دی تعداد 7 توں ودھ تے 44 تھی ڳئی اے۔ قیصر احمد شیخ آکھیا جو لینڈ لیز پالیسی (BQIP) دی منظوری سرمایہ کاراں کیتے ہک اہم سہولت اے، جیندے نال صنعتی منصوبیاں دی رفتار تیز تھیسی تے کاروباری لاگت ڳھٹ تھیسی۔ انھاں آکھیا جو وزیراعظم شہباز شریف دی قیادت اچ سی پیک 2.0 دے تحت صنعتی تعاون دے نویں دور دا آغاز تھی ڳئے۔