وزیراعظم شہباز شریف دا غربت، بے روزگاری، قرضیاں توں نجات تے دہشت گردی کوں منݙھوں پٹݨ داعزم، دہشت گردی کوں پاکستان دی سرحداں توں چا تے بحرِ ہند اچ ٻوڑ ݙیسوں، وزیراعظم

اسلام آباد۔ 16 جنوری (اے پی پی) وزیراعظم محمد شہباز شریف ملک توں غربت، بے روزگاری دے خاتمے، قرضیاں توں نجات حاصل کرݨ تے دہشت گردی کوں منڈھوں پٹݨ دا عزم کریندیں ہوئیں آکھیے جو قومی اتحاد تے یکجہتی دی جتنی لوڑھ اے پہلے کݙاہیں نہ ہئی۔ ملک اچ دہشت گردی دے ناسور ولا سر چاتے۔ خوارج ٹی ٹی پی تے ٹی ٹی اے دا گٹھ جوڑ اے۔ اساݙے دشمناں دے ذریعے انھاں کوں وسائل ملدے پئن۔ دہشت گردی کوں پاکستان دی سرحداں توں چا تے بحرِ ہند اچ ٻوڑ ݙیسوں۔ سارے مذہباں دے منݨ آلیاں کوں آپݨے طریقیاں نال عبادت تے تہوار مناوݨ دا پورا حق اے۔اللہ تعالیٰ پاکستان کوں جیہڑے وسائل عطا کیتن او شاید ای کہیں ٻئے ملک کول ہوون، جے اساں انھاں کوں استعمال کروں تاں اساݙے سارے مسئلے ختم تھی ویسن۔ معرکہ حق اچ افواجِ پاکستان دشمن کوں ایجھا سبق سکھایا جیہڑا رہندی دنیا تئیں نہ بھلسی ۔ اے ڳالھیں انھاں جمعہ کوں اتھاں “قومی پیغامِ امن کمیٹی” دے ارکان نال ڳالھ مہاڑ کریندیں ہوئیں کیتا۔ ایں موقع تے وفاقی وزیر اطلاعات عطا اللہ تارڑ، وزیر مملکت داخلہ طلال چوہدری تے ٻئے حکام وی موجود ہن۔ وزیراعظم آکھیا جو قومی پیغامِ امن کمیٹی دے ارکان کوں دل دی گہرائیاں توں خوش آمدید آکھداں۔ پاکستان بانی پاکستان قائد اعظم محمد علی جناح دی عظیم تحریک تے لکھاں مسلماناں دی قربانیاں دے بعد وجود اچ آیا۔ تحریکِ پاکستان اچ اقلیتی برادری وی بھرپور کردار ادا کیتا۔ سیسل چوہدری، رانا بھگوان داس تے ٻئے ممبران دی خدمات ٻہوں زیادہ ہن۔ پاکستان بݨاوݨ دا مقصد ہک ایجھا خطہ حاصل کرݨ ہئی جتھاں اسلام دا بول بالا ہووے۔ ہر پاکستانی کوں آپݨی قابلیت دے زور تے مقام بݨاوݨ دا حق اے۔ وزیراعظم آکھیا جو اج پاکستان ترقی دے راہ تے گامزن اے۔ قیامِ پاکستان اچ علماء کرام دا وی ٻہوں وݙا کردار ہئی۔ پاکستان کوں صحیح معنوں اچ ہک فلاحی ریاست بݨیسوں۔ مئی 2025 اچ معرکہ حق اچ افواجِ پاکستان ہندوستان کوں شکستِ فاش ݙتی۔ اے فتح اللہ دی مدد، افواج دی جرات، بہترین ٹیکنالوجی تے 24 کروڑ عوام دی دعاواں دا نتیجہ اے۔ فیلڈ مارشل سید عاصم منیر دی قیادت اچ اللہ اساکوں فتح نال نوازیا۔انھاں آکھیا جو اج سب توں وݙا چیلنج دہشت گردی اے۔ ایں جنگ اچ ہک لکھ پاکستانی شہید تھی ڳئن۔ افواج، پولیس، رینجرز تے ٻئے اداریاں دے ہزاراں جواناں قربانیاں ݙے تے ٻیاں ملکاں کوں وی بچایا۔ اج خوارج دا گٹھ جوڑ اساݙے سامݨے اے۔ جیویں 2018 اچ دہشت گردی کوں ختم کیتا ہئی، میکوں یقین اے جو ایں واری وی ایندا سر کچل ݙتا ویسے۔ قومی پیغامِ امن کمیٹی دے کنوینر مولانا طاہر اشرفی آکھیا جو وزیراعظم دے اعتماد تے پورا اترسوں۔ پشاور وچ علماء مشائخ کانفرنس سݙائی ویسے ۔ مدارس دے 15 اچوں 11 بورڈز دے ممبر اتھاں موجود ہن۔ مفتی عبدالرحیم آکھیا جو ریاست دا مضبوط بیانیہ عوام تئیں ونڄݨا چاہیدے۔ علامہ عارف واحدی آکھیا جو خوارج دا اسلام نال کوئی تعلق کائنی۔ علامہ محمد حسین اکبر آکھیا جو اے کمیٹی قومی وحدت دی علامت اے۔ علامہ ضیاء اللہ شاہ بخاری آکھیا جو سیاسی تے عسکری قیادت ہک پیج تے اے۔ ہندو کمیونٹی دے راجیش کمار تے مسیحی برادری دے بشپ آزاد مارشل وی آکھیا جو او ملک دے دفاع کیتے افواجِ پاکستان دے نال کھڑن۔ ڈائریکٹر جنرل مذہبی تعلیمات ڈاکٹر غلام قمر ݙسایا جو ملک اچ 36 ہزار مدارس رجسٹرڈ ہن جتھاں دینی تعلیم دے نال نال دنیاوی تعلیم وی ݙتی ویندی پئی اے تانجو ٻالاں کوں روزگار مل سڳے۔ انھاں آکھیا جو اے پروپیگنڈہ غلط اے جو درسِ نظامی کوں متاثر کیتا ویندا پئے۔