شبِ معراج دا بابرکت موقع پوری امتِ مسلمہ کیتے روحانی بلندی دی عظیم علامت اے، صدر آصف علی زرداری

اسلام آباد۔ 16 جنوری(اے پی پی) صدرِ مملکت آصف علی زرداری آکھیے جو شبِ معراج دا بابرکت موقع پوری امتِ مسلمہ کیتے روحانی بلندی، کامل ایمان اتے اللہ تعالیٰ دے قرب دی عظیم علامت اے۔ ایں مقدس رات اللہ تعالیٰ اپݨے محبوب نبی حضرت محمد مصطفیٰ ﷺ کوں او عظیم الشان اعزاز عطا فرمایا جیہڑا انسانی عقل توں ٻاہرو اے۔ صدرِ مملکت آکھیا جو واقعہ معراج ساکوں سبق ݙیندے جو پختہ ایمان اتے صبر دے ذریعے انسان بلند درجات تئیں پڄ سڳدے۔ انھاں آکھیا جو ایں رات امت کوں نماز دا تحفہ عطا کیتا ڳیا جیہڑا خالق اتے بندے دے درمیان رابطہ اے۔ صدر زرداری قوم توں اپیل کیتی جو او شبِ معراج دے سنیہے کوں اپݨی زندگی دا حصہ بݨاون تاں جو برداشت، سماجی انصاف اتے انسانیت نال ہمدردی کوں فروغ مل سڳے۔ انھاں دعا کیتی جو اللہ پاکستان کوں امن، سلامتی اتے پائیدار ترقی عطا فرماوے۔