سرگودھا دے نیڑے گاݙی نہر اچ ڈھݨ پاروں 14 بندے جاں بحق، 9 زخمی

سرگودھا۔ 17 جنوری (اے پی پی) شدید دھند تے تیز رفتاری پاروں تھانہ کوٹ مومن دے علاقے غلام پور دے نیڑے گاݙی خشک نہر اچ ڈھݨ نال تریمتاں تے ٻالاں سودھے 14 بندے جاں بحق اتے 9 شدید زخمی تھی ڳئن۔ ریسکیو ذرائع دے مطابق گاݙی اچ تقریباً 23 مسافر سوار ہن۔ اے گاݙی اسلام آباد توں فیصل آباد ہک جنازے اچ شرکت کیتے ویندی پئی ہئی۔ موٹر وے کوں شدید دھند پاروں ٹریفک کیتے بند کرݨ دے بعد ڈرائیور کوں مقامی رستہ اختیار کرݨا پیا۔ پولیس حکام دا آکھݨ اے جو حدِ نگاہ گھٹ ہووݨ دی وجہ توں ڈرائیور گاݙی توں کنٹرول کھو ݙتا جیندے پاروں گاݙی پل توں خشک غلام پور نہر اچ ونڄ ڈٹھی۔ حادثے اچ جاں بحق تھیوݨ آلیاں دا تعلق راولپنڈی دے ہکے خاندان نال ہئی، جیہڑے الٹݨ آلی گاݙی دے تلے پھس ڳئے۔ ریسکیو اہلکاراں جاں بحق تھیوݨ آلیاں دی شناخت حلیمہ بی بی (65)، سونیا بی بی (35)، پٹھانی بی بی (35)، ایمان فاطمہ (19)، رانی بی بی (31)، مصری خان (50)، یاسین (65) تے وسیم عباس (30) دے نانواں نال کیتی اے۔ جان دی بازی ہارݨ آلے چھی ٻالاں اچ ہانیہ (2)، محمد حارث (2)، حوریں فاطمہ (3)، آمنہ (1)، حرم فاطمہ (4) تے ثقلین (5) شامل ہن۔ ریسکیو ٹیماں لاشاں تے زخمیاں کوں تحصیل ہیڈ کوارٹر (ٹی ایچ کیو) ہسپتال کوٹ مومن تے ڈسٹرکٹ ہیڈ کوارٹر (ڈی ایچ کیو) ہسپتال سرگودھا منتقل کر ݙتے۔ زخمیاں دی شناخت محمد حسنین (02)، ثقلین (02)، محمد ظاہر (38)، محمد ممتاز (40)، شفیق (40)، بی بی (55)، نادیہ (45) تے پروین بی بی (22) دے ناواں نال تھئی اے۔ پولیس حکام واقعے دی تحقیقات شروع کر ݙتی اے۔