پاکستان چین دے تجربات تے مہارت توں فائدہ چا تے سالاں اچ نئی مہینیاں اچ کمال کر سڳدے، پاکستان دی معیشت استحکام دے بعد پائیدار ترقی آلے پاسے ویندی پئی اے ، سی پیک 2.0 کوں حقیقت تے کامیاب کریسوں ، وزیراعظم شہباز شریف

اسلام آباد۔ 19 جنوری (اے پی پی) وزیراعظم محمد شہباز شریف زراعت، آئی ٹی تے مصنوعی ذہانت (اے آئی) سودھے مختلف شعبیاں اچ چین دی ترقی کوں مثال قرار ݙیندیں ہوئیں آکھیے جو پاکستان چین دے تجربات تے مہارت توں فائدہ چا تے سالاں اچ نئی مہینیاں اچ کمال کر سڳدے، پاکستان دی معیشت استحکام دے بعد پائیدار ترقی آلے پاسے ویندی پئی اے ، سی پیک 2.0 کوں حقیقت تے کامیاب کریسوں۔ اے ڳالھیں انہاں سنوار کوں پاک چین ایگری انویسٹمنٹ کانفرنس نال خطاب کریندیں ہوئیں کیتا۔ ایں موقع تے رانا تنویر حسین، جام کمال، اویس لغاری، عطاء اللہ تارڑ، شزا فاطمہ خواجہ سودھے وفاقی وزراء، وزراء مملکت، پاکستان اچ چین دے سفیر جیانگ ژائی ڈونگ، بیجنگ اچ پاکستان دے سفیر خلیل ہاشمی، پاکستانی تے چینی کمپنیاں دے نمائندے تے اعلیٰ سرکاری حکام وی موجود ہن۔ وزیراعظم زراعت کوں پاکستانی معیشت دی ریڑھ دی ہڈی قرار ݙیندیں ہوئیں آکھیا جو ایندے اچ وسیع مواقع موجود ہن، جدید ٹیکنالوجی کوں استعمال کر تے پیداوار ودھاوݨی پوسی۔وزیراعظم آکھیا جو چین پاکستان کوں بہترین مہارت تے ٹیکنالوجی ݙیندا پئے۔ انھاں ݙسایا جو ہک ہزار پاکستانی زرعی گریجویٹس کوں ملک بھر توں میرٹ تے چݨ تے چین دی زرعی یونیورسٹیاں تے تحقیقاتی مراکز اچ بھیڄا ڳیا ہئی جیندے توں انھاں بہترین تربیت حاصل کیتی۔ایں توں پہلے چین دے سفیر جیانگ ژائی ڈونگ آکھیا جو پاکستان چین زرعی سرمایہ کاری کانفرنس اچ شرکت انھاں کیتے خوشی دی ڳالھ اے۔