وفاقی وزیرِ تجارت جام کمال خان “میڈ اِن ازبکستان” نمائش دا افتتاح کرݙتے

اسلام آباد۔ 7 فروری(اے پی پی) وفاقی وزیرِ تجارت جام کمال خان پاکستان ازبکستان بزنس فورم دے موقع تے “میڈ اِن ازبکستان” نمائش دا افتتاح کر ݙتے۔ انہاں ازبک وزیرِ تجارت نال نمائش دا ربن کٹ تے باقاعدہ افتتاح کیتا۔ ہک بیان دے مطابق نمائش نال الیندے وفاقی وزیر تجارت جام کمال خان آکھیا جو میڈ اِن ازبکستان نمائش پاکستان اتے ازبکستان وچال تجارتی اتے صنعتی تعاون ودھاوݨ کیتے وݙی اہم اے، اینڄھیاں نمائشاں بزنس ٹو بزنس روابط، مشترکہ منصوبیاں اتے سرمایہ کاری دے نویں موقع پیدا کریندن، پاکستان اے ازبکستان وچال ترجیحی تجارتی معاہدے اتے بزنس کونسل نال ݙوطرفہ تجارت ٻئی ودھسی۔ وفاقی وزیرِ تجارت نمائش اچ مختلف اسٹالز دا دورہ کیتا اتے ازبک مصنوعات دے معیار اتے برآمدی صلاحیت کوں سراہیا۔ ایں موقع تے وفاقی وزیرِ مواصلات عبدالعلیم خان علاقائی رابطہ کاری اتے انفراسٹرکچر تعاون ودھاوݨ تے زور ݙتا۔ نمائش دے افتتاح اچ شریک وفاقی وزیرِ قومی غذائی تحفظ رانا تنویر حسین زراعت اتے فوڈ پروسیسنگ دے شعبے اچ تعاون دے وسیع امکانات اڳونہے کیتے۔ معاونِ خصوصی برائے صنعت و پیداوار ہارون اختر خان صنعتی شراکت داری تے سرمایہ کاری دے موقعیاں کوں اہم قرار ݙتا۔ میڈ اِن ازبکستان نمائش ازبک صنعت، دستکاری تے اختراعی مصنوعات کوں پاکستانی مارکیٹ نال متعارف کراوݨ دا ہک مؤثر پلیٹ فارم اے۔