چیئرمین پی سی بی محسن نقوی ٹی ٹوئنٹی ورلڈ کپ اچ نیدرلینڈز دے خلاف کامیابی فہیم اشرف دے جاڑے ٻالاں دے ناں کر ݙتی

لاہور۔ 7 فروری (اے پی پی) چیئرمین پاکستان کرکٹ بورڈ (پی سی بی) محسن نقوی پاکستان دی ٹی ٹوئنٹی ورلڈ کپ اچ نیدرلینڈز دے خلاف پہلا میچ جیتݨ کیتے اہم ترین کردار ادا کرݨ والے فہیم اشرف کوں خراجِ تحسین پیش کریندے اے کامیابی آل راؤنڈر فہیم اشرف دے جاڑے ٻالاں دے ناں کر ݙتی اے۔ کولمبو اچ کھیݙے گئے ٹورنامنٹ دے افتتاحی میچ اچ پاکستان سنسنی خیز مقابلے دے بعد نیدرلینڈز کوں 3 وکٹاں توں ہراعے۔ نیدر لینڈ دے 147 رنز دے ولدے اچ پاکستان اے ہدف چھیکڑی اوور اچ پورا کیتے۔ پاکستان میچ اچ ݙاݙھے دبائو اچ ہا اتے پاکستان کوں آخری ݙو اوورز اچ 29 رنز دی لوڑھ ہئی ٻھل فہیم اشرف ہک سوھݨی واری کھیݙدے ہوعے چھکے چوکیاں دا مینہہ وسا ݙتے اتے میچ دا پاسہ پلٹ ݙتے۔ فہیم اشرف 11 گینداں تے ناقابلِ شکست 29 رنز ٻݨائے، انہاں کوں شاندار کارکردگی تے “پلیئر آف دی میچ” قرار ݙتا گیا۔ انہاں دی دلیرانہ اننگز پاروں پاکستان نیدرلینڈز دے خلاف شکست توں بچدے ہوئیں ٹورنامنٹ دا فاتحانہ آغاز کیتے۔ میچ دے بعد چیئرمین پی سی بی محسن نقوی سوشل میڈیا پلیٹ فارم ایکس تے فہیم اشرف دے جاڑے ٻالاں دی تصویر شیئر کریندے لکھیا جو نیدرلینڈز دی ٹیم ٻہوں چنڳاں کھیݙی اے ٻھل اڄ دی اے سوھݨی جیت فہیم اشرف دے جاڑے ٻالاں دے ناں کرینداں۔