قرضیاں دے خطرات نال نبڑݨ کیتے تکھے اقدامات تے مضبوط ادارے ضروری ہن، وزیرِ خزانہ محمد اورنگزیب

العلاـ 9 فروری(اے پی پی ) وفاقی وزیرِ خزانہ تے محصولات سینیٹر محمد اورنگزیب آکھیا جو اصل پالیسی چیلنج صرف قرضیاں دے حجم کوں سن٘بھالݨ نئیں، بلکہ “لیکویڈٹی” (نقدی) دے دباؤ کوں ادائیگی دی عدم صلاحیت اچ بدلݨ توں روکݨ اے۔ انہاں آکھیا جو خودمختار قرضیاں دے خطرات توں نبڑݨ کیتے بروقت اقدامات، تکھے فیصلے، شفافیت تے قابلِ اعتماد پالیسی فریم ورک دی لوڑھ اے۔ اے گالھ انہاں سنوار دے ڈینہہ سعودی عرب دے شہر العلا اچ تھیوݨ آلی “العلا کانفرنس 2026” دے موقع تے ہک اعلیٰ سطح دے اجلاس نال خطاب کریندیں ہوئے آکھیا۔ اے کانفرنس سعودی حکومت تے آئی ایم ایف دے اشتراک نال منعقد کیتی گئی اے۔ وزیرِ خزانہ ایں موقع تے آکھیا جو عالمی سطح تے سرکاری قرضے تاریخ دی بلند ترین سطح تے ہن، جیندے نال ترقی پذیر ملکاں تے دباؤ ودھدا پئے۔پاکستان معاشی پالیسیاں تے ادارہ جاتی اصلاحات دے ذریعے استحکام دی بحالی اچ اہم پیش رفت کیتی اے، پر اصلاحات دا سفر اجاں جاری اے۔ وزیرِ خزانہ ڈسایا جو پچھلے ترائے سالاں اچ پاکستان دا قرضہ جی ڈی پی دے تناسب نال 74 فیصد توں گھٹ تھی کراہیں 70 فیصد تئیں آ گئے، جیہڑی ہک وڈی کامیابی اے۔ انہاں ڈسایا جو پاکستان ٹیکس وصولی اچ بہتری آندی اے، جیہڑی پہلے سنگل ڈیجٹ اچ ہئی پر ہݨ ڈیجیٹلائزیشن تے ٹیکس نیٹ ودھاوݨ نال تقریباً 12 فیصد دے نیڑے پڄ ڳئی اے۔ سینیٹر محمد اورنگزیب آکھیا جو پاکستان “گرین سکوک” دے اجرا تے پائیدار فنانسنگ فریم ورک دے ذریعے قرضیاں کوں موسمیاتی اہداف نال جوڑیندا پئے۔ وزیرِ خزانہ زور ڈتا جو ابھردی ہوئی معیشتاں کوں قرضیاں دی ادائیگی دے نال نال ترقیاتی تے سماجی کماں کیتے وی فنڈز دا تحفظ کرݨا پوسی۔ انہاں آکھیا جو قرضہ ڈیوݨ آلیاں دے درمیان تعاون کوں مضبوط بݨاوݨ وی ویلھے دی اہم لوڑھ اے۔