دریاخان، کے پی کے نال ملحقہ دریائے سندھ دے سارے دریائی رستے بند

دریاخان۔ 25 فروری (اے پی پی) ڈیرہ اسماعیل خان پل تے پنجاب پولیس دی بین الصوبائی چیک پوسٹ تے خودکش حملے دے بعد ضلع بھکر اچ ہائی الرٹ اے، دریاخان ڈیرہ اسماعیل خان پل عارضی طور تے بند کر ݙتا ڳئے۔ جائے وقوعہ توں سکیورٹی ادارے چھان بین تے شواہد جمع کرݨ اچ مصروف ہن ۔ کے پی کے نال ملحقہ دریائے سندھ دے سارے دریائی راستے پتن ضلع انتظامیہ بھکر تاحکم ثانی بند کر ݙتن جتھ کہیں قسم دی نقل و حرکت تے آمد و رفت نہ تھیسی۔ دریائی چیک پوسٹاں ملحقہ آبادی اچ سرچ آپریشن شروع کیتے ہوئن جتھ کڑی نگرانی کیتی ویندی پئی اے، پورے ضلعے اچ مشکوک بندیاں دی سنڄاݨ تے تصدیق ممکن بݨائی ویندی پئی اے۔ رات توں مسیتاں، دینی عبادت گاہواں تے بازاراں اچ سکیورٹی فول پروف ٻݨائی ڳئی اے، کے پی کے توں تعلق رکھݨ آلے رہائش پذیر بندیاں دی سکروٹنی کیتی ویندی پئی اے، قبائلی علاقیاں توں آئے عارضی لوکاں دی سخت چیکنگ کیتی ویندی پئی اے۔ پولیس، ایلیٹ فورس تے سی ٹی ڈی سودھے سارے سکیورٹی ادارے متحرک ہن اے۔ پبلک ڄہیں تے لاری اݙیاں تے پولیس سخت چیکنگ کریندی پئی اے، کے پی کے نال ملحقہ دریائے سندھ دے دریائی رستیاں تے مقامی لوک وی پولیس نال تعاون کریندے پئن۔