ایران دی مجلسِ خبرگانِ رہبری سید مجتبیٰ حسینی خامنہ ای کوں نواں سپریم لیڈر منتخب کر ڳھدا

تہران۔ 9 مارچ (اے پی پی) ایران دی ”مجلسِ خبرگانِ رہبری“28 فروری 2026 کوں امریکی تے اسرائیلی حملے اچ شہید تھیوݨ آلے ایران دے سپریم لیڈر آیت اللہ سید علی خامنہ ای دے پتر سید مجتبیٰ حسینی خامنہ ای کوں ملک دا نواں سپریم لیڈر منتخب کر ڳھدے، 1979 دے انقلابِ ایران دے بعد او ملک دے تریجھے منتخب سپریم لیڈر ہن۔ العربیہ اردو دے مطابق ایران دی 88 ارکان تے مشتمل مجلسِ خبرگانِ رہبری ہک بیان اچ اعلان کیتا جو غیر معمولی اجلاس اچ مجلس دے نمائندیاں دی فیصلہ کن ووٹنگ دی بنیاد تے مجتبیٰ حسینی خامنہ ای کوں اسلامی جمہوریہ دا تریجھا سپریم لیڈر مقرر کیتا ڳئے۔ مجلسِ خبرگانِ رہبری ایرانی عوام توں اتحاد برقرار رکھݨ تے نویں سپریم لیڈر دی حمایت کرݨ دی اپیل وی کیتی۔ ایران دی سپریم نیشنل سکیورٹی کونسل دے سیکرٹری علی لاریجانی دا آکھݨ ہئی جو مجتبیٰ خامنہ ای انھاں حساس حالات اچ ایران دی قیادت کرݨ دی صلاحیت رکھیندن، اساں نویں سپریم لیڈر دے پچھوں متحد تھی تے کھڑے تھیوݨ دی اپیل کریندوں۔ شہید سید علی خامنہ ای دے ݙوجھے پتر مجتبیٰ حسینی خامنہ ای 8 ستمبر 1969 کوں شمال مشرقی ایران دے شہر مشہد اچ پیدا تھئے، انھاں دی پرورش 1979 اچ ایران اچ شہنشاہیت دے خاتمے دے بعد تشکیل پاوݨ آلے مذہبی تے سیاسی ماحول اچ تھئی۔ انھاں دا تعلق ایران دے ہک معروف مذہبی خاندان نال اے۔ انھاں آپݨی ثانوی تعلیم تہران دے علوی مذہبی سکول توں حاصل کیتی، بعد اچ 1999 اچ او مذہبی تعلیم جاری رکھݨ کیتے حوزہ علمیہ قم منتقل تھی ڳئے۔