قلعہ کہنہ قاسم باغ دی بحالی کیتے 50 کروڑ دے اضافی فنڈز جاری، منصوبہ جون تئیں مکمل کرݨ دی ہدایت

ملتان۔ 09 مارچ (اے پی پی) کمشنر ملتان ڈویژن عامر کریم خان والڈ سٹی اتھارٹی دی نگرانی اچ  قلعہ کہنہ قاسم باغ اچ جاری اپ گریڈیشن تے بحالی دے منصوبے دا تفصیلی دورہ کیتا اتے جاری ترقیاتی کماں دی پیشرفت دا جائزہ ڳھدا۔ ایں موقع تے ڈپٹی کمشنر محمد نعمان صدیق اتے ٻئے متعلقہ افسراں وی انھاں دے نال موجود ہن۔ کمشنر منصوبے دے مختلف حصیاں دا معائنہ کریندیں ہوئیں تعمیراتی معیار، ڈیزائن تے کم دی رفتار دا جائزہ ڳھدا اتے متعلقہ حکام کوں ہدایت کیتی جو منصوبے کوں مقررہ مدت دے اندر مکمل کرݨ کیتے کم دی رفتار ٻئی تیز کیتی ونڄے۔ انھاں آکھیا جو قلعہ کہنہ قاسم باغ ملتان دے تاریخی ورثے دی ہک اہم علامت اے اتے ایندی بحالی شہر دی تاریخی شناخت کوں ٻیا اجاگر کریسی۔ ایں موقع تے کمشنر ݙسایا جو انھاں دی درخواست تے وزیرِ اعلیٰ پنجاب قلعہ کہنہ قاسم باغ دی بحالی تے اپ گریڈیشن کیتے 50 کروڑ روپے دے اضافی فنڈز جاری کر ݙتن۔ کمشنر قلعہ کہنہ قاسم باغ اچ قائم لائبریری اچ جدید طرز دا کیفے بݨاوݨ دے منصوبے تے وی جلدی کم شروع کرݨ دی ہدایت کیتی۔