غیر ضروری خرچے اتے پٹرول دا استعمال ڳھٹ کیتا ونڄے، کمشنر ملتان ڈویژن

ملتان۔ 11 مارچ (اے پی پی) وزیراعلیٰ پنجاب مریم نواز شریف ولوں جاری کردہ کفایت شعاری پالیسی تے عملدرآمد دے جائزے کیتے کمشنر ملتان ڈویژن عامر کریم خان دی صدارت اہم اجلاس تھیا۔ اجلاس اچ ملتان ڈویژن دے سارے اضلاع دے ڈپٹی کمشنرز ویڈیو لنک دے ذریعے شریک تھئے جݙاں جو متعلقہ محکمیاں دے افسر وی موجود ہن۔ ڈپٹی کمشنرز بریفنگ ݙیندیں ہوئیں ݙسایا جو سرکاری وسائل دی بچت کیتے مختلف اقدامات کیتے ویندے پئن۔ کمشنر ہدایت کیتی جو ایجھے سرکاری دفاتر جتھاں براہِ راست عوامی خدمات فراہم کائنی کیتی ویندن، اتھاں عملے دی حاضری کوں 50 فیصد تئیں محدود کیتا ونڄے تانجو بجلی تے ٻئے وسائل دی بچت ممکن بݨائی ونڄ سڳے۔ انھاں ٻئی ہدایت کیتی جو چار ݙینھ دفتری ہفتہ نافذ کرݨ دے احکامات تے عملدرآمد یقینی بݨایا ونڄے۔ کمشنر ملتان سرکاری افسراں کوں ہدایت کیتی جو او غیر ضروری سرکاری دوریاں توں پرہیز کرن اتے سرکاری گاݙیاں اچ پٹرول دے بے جا استعمال کوں ڳھٹ کرن۔ انھاں آکھیا جو جدید ٹیکنالوجی دے استعمال نال سرکاری کم گھر بیٹھے وی تھی سڳدن جیندے نال وقت تے وسائل ݙوہیں دی بچت تھیسی۔ انھاں آکھیا جو ایندھن تے بجلی دی بچت کوں قومی ذمہ داری دے طور تے اپݨاوݨا پوسی۔