حکومت دیاں کامیاب خارجہ پالیسی پاروں پاکستان دے روس ، وسطی ایشیائی ریاستاں اتے دنیا دے کئی بئے ملکاں نال بہوں چنگے تعلقات بنڑدے پئے ہن ، انجینئر بلیغ الرحمان

اسلام آباد ۔ 17 اکتوبر (اے پی پی) وزیر مملکت برائے داخلہ انجینئر بلیغ الرحمان آکھے جو مسلم لیگ (ن) دی حکومت دی کامیاب خارجہ پالیسی پاروں پاکستان دے روس ، وسطی ایشیائی ریاستاں اتے دنیا دے بئے بہوں سارے ملکاں نال چنگے تعلقات بنڑ دے پئے ہن ۔ ریڈیو پاکستان دے پروگرام نقطہ نظر اچ گالھ مہاڑ کریندے ہوئیں انہاں آکھیا جو پاکستان مسلم لیگ (ن) دی کامیاب خارجہ پالیسی پاروں دنیا پاکستان کوں خراج تحسین پیش کر یندی پئی ہے اتے بھارت مقبوضہ کشمیر اچ تھیونڑ آلی جارحیت پاروں ساری دنیا اچ صفائیاں پیش کرنڑ دے باوجود کلہا نظر آندا پئے ۔ انہاں آکھیا جو دنیا مسئلہ کشمیر تے پاکستان دے موقف دی حمایت کریندی پئی ہے ۔ انجینئر بلیغ الرحمان آکھیا جو وزیر اعظم نواز شریف دی ہدایت تے پاکستانی دفتر خارجہ اتے سفیر مسئلہ کشمیر کوں ساری دنیا اچ مثبت انداز اچ اجاگر کر یندے پئے ہن ، جڈانجو اقوام متحدہ اچ پاکستانی مندوب ملیحہ لودھی ہر موقعے تے مسلہ کشمیر دے حوالے نال آپنڑیں فرائض چنگے انداز اچ پیش کریندی پئن،اتے اقوام متحدہ سمیت عالمی طاقتاں کوں مقبوضہ کشمیر اچ کیتے ونجنڑآلے بھارتی مظالم دی تفصیل نال آگاہ کر یندی پئی ہن۔ انھاں آکھیا جو اے وجہ ہے جو ہنڑ مقبوضہ کشمیر اچ تحریک آزادی ہک نویں موڑ تے نظر آندی پئی ہے ۔پاک روس تعلقات بارے انہاں آکھیا جو ڈوہائیں ملکاں دے تعلقات بہوں عرصے کوں کشیدہ ہن جڈانجو موجود ہ حکومت دے وور اچ ڈو طرفہ تعلقات اچ بہتری آئی ہے اتے ڈوہائیں ملکاں مشترکہ فوجی مشقاں وی کیتیاں ہن ۔