اقوام متحدہ دے سیکرٹری جنرل دا عاصمہ جہانگیر دے انتقال تے اظہار تعزیت

اقوام متحدہ ۔ 12 فروری (اے پی پی) اقوام متحدہ دے سیکرٹری جنرل انتونیو گوترش معروف قانون دان عاصمہ جہانگیر دے انتقال تے ڈکھ دا اظہار کریندے ہوئیں آکھیے جو انہاں دے انتقال نال انسانی حقوق دے حوالے نال بہوں قدآور شخصیت ونجا ڈتی اے۔عاصمہ جہانگیر حقوق انسانی سانگے اقوم متحدہ دی خصوصی ایلچی وی رہیاںہن۔نیویارک اچ عالمی ادارے دے صدر دفتر توں جاری بیان اچ انتونیو گوترش آکھیے جو عاصمہ جہانگیر دے انتقال دی خبر پاکستان اتے پوری دنیا اچ ڈکھ دے نال سنڑی گی ۔انہاں ہک معروف قانون دان دی حیثیت نال اپنڑے ملک تے اقوام متحدہ دے خصوصی ایلچی دی حیثیت نال پوری دنیا اچ انساناں دے بنیادی حقوق اتے انہاں کوں انصاف دی فراہمی سانگے ودھ ساری جدوجہد کیتی۔او ذہین، اصول پرست، تے جرات مند تے مہربان شخصیت دی مالک ہن ۔ انتونیو گوترش عاصمہ جہانگیر دے انتقال تے انہاں دے خاندان، دوستاں، اقوام متحدہ اتے پاکستان اچ انہاں دے ساتھیاں نال دلی تعزیت دا اظہار کریندے ہوئیں آکھیے جو انہاں کوں ہمیشہ یاد رکھیا ویسی ۔