وزارتِ تجارت ولوں زمینی رستے دے ذریعے ایران، آذربائیجان اتے وسطی ایشیائی ملکاں کوں برآمدات دی اجازت

اسلام آباد۔ 28 مارچ(اے پی پی) وزارتِ تجارت ایران اتے وسطی ایشیائی ریاستاں کیتے برآمدات اتے فنانشل انسٹرومنٹ توں عارضی استثنیٰ منظور کریندے زمینی رستے توں برآمدات دی اجازت ݙے ݙتی اے۔ وفاقی وزیرِ تجارت جام کمال خان ایں حوالے نال تاریخی قدم چیندے ہوئیاں وفاقی حکومت دا برآمدات ودھاوݨ کیتے ٻہوں وݙا فیصلہ کیتے۔ وفاقی وزیر آکھیے جو ترائے مہینے کیتے خصوصی رعایت 24 مارچ توں 21 جون 2026 تئیں نافذ العمل رہسی۔ حکومت برآمد کنندگان کوں سہولت ݙیوݨ کیتے اے قدم چاتے۔ ایران کوں چاول، گوشت، سبزیاں اتے پھلاں سودھا کئی شئیں برآمد کرݨ دی اجازت ݙے ݙتی ڳئی اے۔ ادویات دی برآمد وی ایں رعایت اچ شامل اے۔ جام کمال خان آکھیے جو ایںدے نال برآمد کنندگان دے خرچے اتے ویلھے اچ کمی آسی اتے ملک معاشی استحکام دو ویسی۔