ملتان اچ مظفرڳڑھ روڈ تے رکشے اچ سلنڈردھماکہ، 3 بندے جاں بحق، 14 زخمی

ملتان۔ 05 اپریل (اے پی پی) ملتان دے علاقے پل عاشق آباد، مظفرڳڑھ روݙ تے ہک افسوسناک واقعہ پیش آئے جتھاں چلدے آٹو رکشے اچ اچانک بھاہ لڳ ڳئی ، جیندے نتیجے اچ ہکے خاندان دے 14 بندے سڑ تے زخمی تھی ڳئے تے ترائے لوک موقع تے جاں بحق تھی ڳئن۔ ریسکیو حکام موجب حادثہ ایل پی جی سلنڈر دھماکے پاروں پیش آئے۔ ترجمان ریسکیو 1122 موجب رکشہ ناگ شاہ چوک توں بہاولپور چوک آلے پاسے ویندا پیا ہئی تے ایندے اچ 10 توں 15 بندے سوار ہن جݙاں جو اچانک سلنڈر دھماکے نال پھٹ پیا، جئیں پاروں رکشے اچ بھاہ لڳ ڳئی۔بھاہ کجھ ہی دیر اچ رکشے کوں آپݨی ولھیٹ اچ گھن ڳھدا، جیں پاروں سوار لوک سڑ ڳئن ۔ ریسکیو ٹیماں وقتی کارروائی کریندے بھاہ تے قابو پاتا جݙاں جو ریسکیو اہلکاراں زخمیاں کوں ٻاہر کڈھ تے وقتی ابتدائی طبی امداد ݙتی۔ ریسکیو حکام موجب حادثے دے نتیجے اچ 3 بندے جاں بحق جݙاں جو 14 زخمی تھئے، جنھاں کوں ابتدائی طبی امداد دے بعد نشتر ہسپتال منتقل کر ݙتا ڳئے۔ ابتدائی اطلاعات موجب متاثرہ خاندان مظفرڳڑھ چوک قریشی توں ملتان آندا پیا ہئی۔