ولی عہد نواب آف بہاول پور سر صادق محمد خان عباسی پنجم، نواب محمد عباس خان عباسی دا ورھیݨاں منایا ڳئے

بہاولپور۔ 16 اپریل(اے پی پی)نواب آف بہاول پور سر صادق محمد خان عباسی پنجم دے ولی عہد، سابق گورنر پنجاب، سابق وفاقی وزیر، امیر آف بہاول پور بریگیڈیئر نواب محمد عباس خان عباسی دا ورھیݨاں 14 اپریل منگل کوں منایا ڳئے۔ او 22 مارچ 1924ء اچ ریاست بہاول پور دے نواب سر صادق محمد خان عباسی پنجم دے گھر ڄمئے ہن۔ انھاں  ایچیسن کالج لاہور توں سینئر اتے ہائر کیمبرج دے امتحان پاس کیتے۔ 1942ء توں 1943ء وچال برٹش ہندوستان دے شہر دہرا دھون توں ہک عسکری انتظامی کورس پاس کیتا۔ ایں توں علاوہ ریاست بہاول پور دی فوج اچ کمیشن گھن تے 5 ویں بٹالین، دی گرینیڈیئرز نال وابستہ رہین۔ بریگیڈیئر نواب عباس خان عباسی 1943 اچ ہندوستان اتے ایران اچ وی خدمات انجام ݙتن، انھاں 1944 اچ برما فرنٹ دا دورہ کیتا۔ 1943 توں 1944 تئیں لاہور اچ  ہیڈ کوارٹرز دی ریکروٹنگ برانچ اچ وی کم کیتے۔ نواب محمد عباس خان عباسی ہک چنڳے منتظم اتے شریف النفس انسان ہووݨ دے نال نال  ہک سپورٹس مین، ہک قابل پولو کھلاڑی وی ہن۔ تقسیم برصغیر دے بعد انہاں پاکستان بوائے اسکاؤٹس ایسوسی ایشن دے ڈپٹی چیف اسکاؤٹ کمشنر دے طور تے خدمات انجام ݙتن اتے 1957ء اچ سوٹن کولڈ فیلڈ اچ پاکستانی دستے دی اڳواݨی کیتی۔ انہاں دیاں بہترین صلاحیتاں اتے قابلیت پاروں نواب آف بہاول پور سر صادق محمد خان عباسی پنجم انہاں کوں اپݨا ولی عہد نامزد کیتا۔ 24 مئی 1966ء کوں نواب سر صادق محمد خان عباسی پنجم دی وفات دے بعد او25 مئی 1966ء کوں امیر آف بہاول پور مقرر تھئین۔ 31 جولائی 1975ء کوں پاکستان پیپلز پارٹی دے دور حکومت اچ انہاں کوں غلام مصطفیٰ کھر دی ڄاہ تے گورنر پنجاب لایا ڳئے جتھاں انہاں 5 جولائی 1977ء تئیں خدمات انجام ݙتن۔ او 15 مارچ 1981ء کوں صدر جنرل محمد ضیاء الحق دی ٻݨائی وفاقی مجلس شوریٰ اچ وفاقی وزیر مذہبی امور رہین۔ انہاں 14 اپریل 1988ء کوں لندن اچ وفات پاتی جیندے بعد حکومت پاکستان انہاں دے صاحبزادے نواب صلاح الدین عباسی کوں امیر آف بہاول پور دا خطاب ݙتے۔ نواب صلاح الدین عباسی 5 واری تحصیل احمد پور شرقیہ دے قومی حلقہ توں ایم این اے وی ٻݨین۔