آثارِ قدیمہ، تعمیرات اتے ثقافتی روایات آلا پائیدار ورثہ ساݙی قومی سنڄاݨ اے، صدرِ مملکت دا عالمی یومِ ورثہ تے سنیہا

اسلام آباد۔ 18 اپریل (اے پی پی)صدرِ مملکت آصف علی زرداری آکھیے جو آثارِ قدیمہ، تعمیرات اتے ثقافتی روایات آلا پائیدار ورثہ ساݙی قومی سنڄاݨ اے، پوری قوم سودھا ساݙے مشترکہ ورثے کوں بچاوݨ دیاں کوششاں کرݨ آلے ہر بندے کوں خراج تحسین پیش کرینداں۔ انہاں اے ڳالھ عالمی یومِ ورثہ دے موقع تے اپݨے سنیہے اچ آکھی۔ انہاں آکھیا جو ساݙا غیر مادی ثقافتی ورثہ ݙاݙھا اہم اے، جیندے اچ لوک داستاناں، زباناں، موسیقی، ہنر اتے فنونِ لطیفہ شامل ہین۔ ہیر رانجھا، سوہنی ماہیوال، عمر ماروی، سسی پنوں، آدم خان و درخانے، ہانی و شاہ مرید جھییاں داستاناں، صوفی شاعراں دا کلام اتے قوالی، علاقائی موسیقی دیاں دھناں ڄیویں رباب، الگوزہ، طبلہ، شہنائی، بانسری، سرود، بینجو، سرنگی اتے ڈھولک ساݙی سنڄاݨ ہین، ساݙا ثقافتی ورثہ ساݙی سانجھی یادداشت اتے جذباتی گہرائی کوں ݙکھیندے، اے روایات نسل در نسل منتقل تھی تے ساݙی سنڄاݨ اتے قدراں کوں برقرار رکھدن۔ انہاں آکھیا جو ساݙے روایتی ہنر پاکستان دے ثقافتی تنوع اتے مہارت دا مظہر ہین جیڑھے ساݙے ماضی اتے حال کوں ہک ٻعے نال سنڄاپو کریندن۔ انہاں آکھیا جو پاکستان دے عالمی ورثے دے مقامات وادیٔ سندھ دی تہذیب، گندھارا دے بدھ مت فن اتے برصغیر دے عرب و مغل دور دے قلعیاں اتے یادگاراں دی نمائندگی کریندن۔ اے مقامات ساڈی تاریخ اتے ثقافتی سوھݨپ دی مثال ہین۔ صدرِ مملکت آکھیا جو اساں انہاں قیمتی اثاثیاں دے تحفظ کیتے جدید طریقے استعمال کرݨ دے عزم تے قائم ہئیں، ورثے دا تحفظ نہ صرف ہک ذمہ داری اے ٻھل سیاحت اتے معاشی سرگرمیاں کوں ودھاوݨ دا ہک اہم موقع وی اے۔ میں حکومتی اداریاں، صوبائی حکام، مقامی کمیونٹیز اتے نوجواناں کوں آہداں جو او مل تے ساݙے ثقافتی ورثے دے تحفظ اتے ایندے فروغ کیتے سانجھیاں کوششاں کرن۔