پی ایف یو جے ورکرز دی طرفوں ڈاکٹر غضنفر مہدی دی اہلیہ دی یاد اچ تعزیتی ریفرنس تے دعائے مغفرت

اسلام آباد۔ 20 اپریل (اے پی پی) پاکستان فیڈرل یونین آف جرنلسٹس ورکرز دی طرفوں نیشنل پریس کلب اسلام آباد اچ ممتاز دانشور، محقق، ادیب تے شاعر ڈاکٹر غضنفر مہدی دی اہلیہ دے انتقالِ ملال دے حوالے نال ہک تعزیتی ریفرنس تے دعائے مغفرت و بلندیِ درجات دا اہتمام کیتا ڳیا جیندے اچ کئی سینئر صحافیاں، ادیباں تے سماجی شخصیات بھرپور شرکت کیتی ۔ نظامت دے فرائض پی ایف یو جے ورکرز دے نائب صدر نیئر سرحدی انجام ݙتے۔

ایں تعزیتی نشست دی صدارت وطنِ عزیز پاکستان دے ممتاز سیاستدان سابق سینیٹر فرحت اللہ بابر کیتی جݙاں جو مہمانانِ خاص اچ ڈاکٹر غضنفر مہدی تے انھاں دی صاحبزادی بیرسٹر رباب مہدی (صوبائی محتسب خیبرپختونخوا) ہن۔ نشست دا آغاز ممتاز صوفی شاعر وفا چشتی تلاوتِ کلامِ پاک توں کیتا تے نعتِ رسولِ مقبول ﷺ وی حاضرین دی نذر کیتی اے۔ معروف صحافی، ادیب تے قلمکار شاہد دھریجہ مرحومہ دے حضور درد بھری نظم تے عقیدت دا اظہار کیتا۔

شرکاء ڳالھ مہاڑاچ شامل حاجی نواز رضا صدر پی ایف یو جے (دستور)، ڈاکٹر سعدیہ کمال مرکزی صدر پی ایف یو جے ورکرز، جاوید ملک فنانس سیکرٹری پی ایف یو جے ورکرز، سبطین رضا لودھی سوشل سائنسٹسٹ تے محترمہ آسیہ چوہدری اپݨے بصیرت افروز خیالات اچ مرحومہ دے اوصافِ حمیدہ، مودت و محبتِ اہلِ بیت ﷺ تے ہک ماء، ذال تے دھی دے لحاظ نال انھاں دی ودھ ساری خدمات تے روشنی پاتی۔

ڈاکٹر غضنفر مہدی تے محترمہ بیرسٹر رباب مہدی مرحومہ دے نال اپݨیاں ناقابلِ فراموش یاداں شیئر کرتے انھاں کوں بے پناہ خراجِ عقیدت پیش کیتے۔ صدرِ مجلس فرحت اللہ بابر دنیا دی بے ثباتی، حیات و موت دے فلسفے تے مرحومہ دی صلاحیتاں دا احاطہ کریندے ہوئیں ڈاکٹر غضنفر مہدی دی اعلیٰ خدمات تے ادبی میدان اچ انھاں دے قد کاٹھ دی تعمیراچ مرحومہ دے مثالی کردار دی توصیف و تعریف کیتی اے۔ چھیکڑ اچ وفا چشتی مرحومہ دی مغفرت تے بلندیِ درجات کیتے اجتماعی دعا کرائی ۔ نشست اچ محمد عسکری نقوی تے ٻئی کئی شخصیات شرکت کیتی۔(ڈاکٹرسعدیہ کمال)