معرکہ حق عوام، حکومت اتے افواج پاکستان وچال اتحاد اتے ہم آہنگی دہ سنڄاݨ اے، فیلڈ مارشل سید عاصم منیر دی اڳواݨی اچ کور کمانڈرز کانفرنس

راولپنڈی۔ 5 مئی (اے پی پی) فیلڈ مارشل سید عاصم منیر آکھیے جو معرکہ حق عوام، حکومت اتے افواجِ پاکستان وچال غیر متزلزل ہم آہنگی دی سنڄاݨ اے، جیڑھے سارے اندرونی اتے بیرونی چیلنجز دے سامݨے “بُنْيَانٌ مَّرْصُوْص” آلی کار ہک مٹھ تھی تے کھڑن۔ فیلڈ مارشل سید عاصم منیر، نشان امتیاز (ملٹری)، ہلال جرأت، چیف آف آرمی سٹاف اتے چیف آف ڈیفنس فورسز دی صدارت اچ 275 ویں کور کمانڈرز کانفرنس تھئی۔ فورم مسلح افواج، قانون نافذ کرݨ والے اداریاں اتے مادرِ وطن دے دفاع اچ اپݨیان جاناں دا نذرانہ پیش کرݨ والے معصوم شہریاں کوں زبردست خراجِ عقیدت پیش کیتے۔ شرکا شہداء دیاں بے مثال قربانیاں کوں خراجِ تحسین پیش کریندے عزم دوہرائے جو جو شہداء دیاں لازوال قربانیاں ہمیشہ پاکستان دی قومی سلامتی، اتحاد تے استقامت دی بنیاد ٻݨیاں رہسن۔ آرمی چیف اتے چیف آف ڈیفنس فورسز پاکستان دی مسلح افواج دی تیاری، پیشہ ورانہ مہارت اتے جنگی صلاحیتاں تے اطمینان کریندے پورے ملک اچ انٹیلی جنس دی بنیاد تے جاری انسدادِ دہشت گردی کارروائیاں اچ کمانڈرز اتے فارمیشنز دے عزم، مستعدی اتے کامیابی دی تعریف کیتی۔ کور کمانڈرز کانفرنس دے مطابق دہشت گرد نیٹ ورکس دے مکمل خاتمے، انہاں دے معاون انفراسٹرکچر دی تباہی اتے پاکستان دی دھرتی کوں کہیں وی شر انگیز کارروائی توں روکݨ کیتے موجودہ آپریشنل رفتار برقرار رکھی ویسی۔ کور کمانڈرز کانفرنس “آپریشن غضب للحق” دے ذریعے دہشت گرداں اتے انہاں دے معاون انفراسٹرکچر دی مسلسل تباہی دا جائزہ گھدے اتے آکھیے جو افغان طالبان رجیم دی غیر منطقی اتے گمراہ کن پالیسی دے تحت خوارج اتے ٻیاں دہشت گرد تنظیماں کوں محفوظ پناہ گاہیں ݙتیاں ویندیاں پین۔ فورم آکھیے جو افغان طالبان رجیم دا دہشت گردی کوں سپورٹ کرݨ افغان عوام دے مفادات دے مکمل خلاف اے اتے اے رجیم ہݨ اپݨے عوام دے سامݨے بالکل بے نقاب تھی چکی اے، افغان طالبان رجیم اڄ کل ہک مسلسل پروپیگنڈے دے تحت پاکستان اتے افغانستان دے اندرو شہریاں کوں نشانہ ٻݨاوݨ دا کوڑا الزام لیندا پئے۔ شرکا آکھیے جو اے گمراہ کن بیانیہ افغان طالبان رجیم دی ہک منظم ڈس انفارمیشن مہم دا حصہ اے، جیںدا مقصد اپݨیاں اندرونی ناکامیاں توں توجہ ہٹاوݨ اتے آپ کوں مظلوم پیش کرݨ دا ڈرامہ رچاوݨ اے۔ کور کمانڈرز کانفرنس آکھیے جو پاکستان انھاں بے بنیاد الزامات کوں واضح طور تے مسترد کریندے ہوئے اے واضح کریندے جو ساݙیاں دفاعی کارروائیاں صرف دراندازاں، دہشت گرداں دے ٹھکاݨیاں اتے معاون انفراسٹرکچر دے خلاف درست نشانیاںتے مبنی ہین۔ فورم علاقائی سلامتی دی صورتحال دا جائزہ گھندے واضح کیتے جو ابھردی ہوئی جیو پولیٹیکل صورتحال علاقائی استحکام تے ݙاݙھا اثر پا سڳدی اے، کور کمانڈرز کانفرنس اچ علاقائی کشیدگی توں بچݨ اتے تحمل اختیار کرݨ دی اہمیت تے زور ݙتا ڳئے۔

شرکا آکھیے جو پاکستان مسلسل ذمہ داری ݙکھیندے خطے اچ استحکام دے ودھارے اتے صورتحال کوں ٻیا خراب تھیوݨ توں روکݨ دیاں کوششاں دی حمایت کریندے، فورم آکھیے جو خطے اچ امن تے استحکام دا دارومدار ہک ٻئے دے تحمل، ذمہ داری اتے خودمختاری دے احترام تے کھڑے۔ فیلڈ مارشل سید عاصم منیر “معرکہ حق” دا یادگار سال مکمل تھیوݨ تے قوم اتے مسلح افواج کوں مبارکباد پیش کیتی، ایکوں ہک اہم سنگِ میل قرار ݙتے اتے آکھیے جو معرکہ حق قومی اتحاد، اجتماعی عزم تے پاکستان دی خودمختاری دے ہر قیمت تے تحفظ دے غیر متزلزل عہد دی عکاسی کریندے۔ کور کمانڈرز کانفرنس آکھیے جو قومی سطح تے معرکہ حق دی یاد مناوݨ بھارتی متکبرانہ سیاسی سوچ کیتے ہک کھلا سنیہا اے جو پاکستانی قوم ہک مٹھ، مضبوط اتے ہر لحاظ نال مکمل طور تے تیار اے۔

فورم مقبوضہ جموں و کشمیر اچ جاری ظلماں، ماورائے عدالت قتل تے آبادیاتی تبدیلیاں دی سخت مذمت کیتی، فورم مقبوضہ جموں و کشمیر دے عوام دی منصفانہ جدوجہد کیتے پاکستان دی سفارتی، سیاسی تے اخلاقی حمایت دے عزم کوں دہرائے اے۔ کانفرنس دے چھیکڑ (اختتام) تے آرمی چیف تے چیف آف ڈیفنس فورسز کمانڈراں کوں ہدایت کیتی جو او ابھردے ہوئے خطریاں دے سامݨے مستعدی تے آپریشنل تیاری دی اعلیٰ سطح کوں برقرار رکھن۔ آرمی چیف تے چیف آف ڈیفنس فورسز پیشہ ورانہ مہارت دے تسلسل، مربوط ردِعمل تے روایتی و غیر روایتی ݙوہیں طرح دے چیلنجز نال نبڑݨ کیتے پہلے توں تیار رہݨ دی ضرورت تے زور ݙتے اے۔