پاکستان دے خلاف ہر مہم جوئی دا خطرناک، دور رس اتے تکلیف دہ ولدا ݙیسوں، ہر بے گناہ پاکستانی دے خون دا حساب ڳھدا ویسی، فیلڈ مارشل سید عاصم منیر دا معرکہ حق دی تقریب نال خطاب

راولپنڈی۔ 10 مئی (اے پی پی) چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر نشان امتیاز (ملٹری)، ہلال جرات آکھیے جو اڄ پاکستان اپݨی موثر، ذمہ دارانہ اتے غیر جانبدار سفارت کاری نال تاریخی امن مذاکرات دی میزبانی کریندا پئے، دشمن ڄاݨ گھنے جو پاکستان دے خلاف آئندہ مہم جوئی دے اثرات محدود نا ہوسن ٻھل انتہائی خطرناک، دور رس اتے تکلیف دہ ہوسن، اساں ہر بے گناہ پاکستانی دے خون دا بدلہ گھنسوں اتے دہشت گردی دے خلاف اے جنگ آخری دہشت گرد دے خاتمے تئیں جاری رہسی۔ انہاں اے ڳالھ جی ایچ کیو راولپنڈی اچ معرکہ حق دی پہلی یادگاری تقریب نال تاریخی خطاب اچ آکھی۔ انہاں آکھیا جو معرکہ حق، آپریشن بنیان مرصوص اچ اللہ تعالیٰ دی رضا نال پاکستان، عوام اتے مسلح افواج کوں ہک بے مثال کامیابی ملی، معرکہ حق ݙو نظریات وچال ہک فیصلہ کن معرکہ ہئی جیندے اچ حق فتحیاب اتے باطل ذلیل تھی تے شکست کھادی۔ فیلڈ مارشل آکھیا جو بھارت دا خواب اے جو او پاکستان کوں عسکری جارحیت اتے سفارتی تنہائی دا نشانہ ٻݨا تے خطے اچ طاقت دا توازن تبدیل کرے، اوندا اے خواب اوندے قد کاٹھ اتے صلاحیت توں ٻہوں وݙا اے ڄیکوں پاکستان کݙاہیں کامیاب نا تھیوݨ ݙیسی۔ انہاں آکھیا جو میں معرکہ حق دے سارے شہداء اتے غازیاں بالخصوص شہید تھیوݨ والیاں نہتی عورتاں، ٻݙھڑیاں اتے معصوم ٻالاں کوں پوری قوم اتے افواج پاکستان ولوں خراج عقیدت پیش کرینداں، اساں اپݨے شہداء دی قربانی کوں امانت، اپݨی طاقت کوں ذمہ داری اتے اپݨی کامیابی کوں خدائے بزرگ برتر دا احسان سمجھدے ہیں۔ فیلڈ مارشل آکھیا جو عوام اتے قومی قیادت دا سنیہا اے جو ملکی خود مختاری، سرحدی سالمیت تے قومی وقار تے کوئی سمجھوتہ قابل قبول کائنی، ہندوستان کوں ایں جنگ دے نتیجے اچ شدید جانی تے مالی نقصان چاوݨا پیا جیندی قیمت او آوݨ والے وقتاں تئیں چکیندا رہسی، فتح میزائلاں اتے پاک فضائیہ دے شاہیناں دشمن دے 26 توں ودھ عسکری اہداف کوں کامیابی نال نشانہ ٻݨایا۔ فیلڈ مارشل آکھیا جو الحمد اللہ! اڄ پاکستان دا دفاع کہیں وی بیرونی جارحیت دے خلاف مکمل طور تے ناقابل تسخیر اے، دشمن ڄاݨ گھنے! پاکستان دے خلاف آئندہ مہم جوئی دے اثرات محدود کائنی ٻھل انتہائی خطرناک، دور رس اتے تکلیف دہ ہوسن۔ انہاں آکھیا جو اڄ دے دور اتے مستقبل دیاں جنگاں ملٹی ڈومین آپریشنز تے مشتمل ہوسن جیندے اچ دور تئیں مار کرݨ والے ہتھیاراں، ڈرونز، سائبر اتے آرٹیفشل انٹیلی جنس دا استعمال تھیسی، افواج پاکستان کوں جدید تقاضیاں نال ہم آہنگ کرݨ سانگے ڈیفنس فورسز ہیڈکوارٹرز قائم کر ݙتا گئے۔ انہاں آکھیا جو پاکستان دا برادر اسلامی ملک سعودی عرب دے نال سٹریٹجک باہمی دفاعی معاہدہ ساڈی سفارتی کامیابیاں دا ہک عظیم سنگ میل اے، اڄ پاکستان اپݨی موثر، ذمہ دارانہ تے غیر جانبدار سفارت کاری دے ذریعے تاریخی امن مذاکرات دی میزبانی کریندا پئے، پاکستان نال روایتی جنگ کوں ناممکن سمجھدے ہوئیں بھارت ہک واری ول دہشت گردی دے گھناؤݨے طریقے دا سہارا گھندا پئے، افغانستان اپݨی سر زمین تے دہشت گردی دے مراکز اتے ٹھکاݨیاں دا مکمل خاتمہ کرے۔ فیلڈ مارشل سید عاصم منیر آکھیا جو میں پاکستان بالخصوص خیبر پختونخوا اتے بلوچستان دے غیور عوام، افواج پاکستان اتے قانون نافذ کرݨ والے اداریاں دے سارے باہمت اتے غیور اہلکاراں کوں سلام پیش کرینداں، اساں ہر بے گناہ پاکستانی دے خون دا بدلہ گھنسوں اتے دہشت گردی دے خلاف اے جنگ آخری دہشت گرد دے خاتمے تئیں جاری رہسی۔

فیلڈ مارشل آکھیا جو اساں ہر محاذ تے کشمیری عوام دی سیاسی، سفارتی اتے اخلاقی مدد جاری رکھسوں، ساڈی منزل او مقام اے جیندے خواب ساݙے وݙیاں ݙٹھے ہن، پاکستان دا سبز ہلالی پرچم امید دا استعارہ اے اتے ایندی مسلح افواج منظم اتے ہر ویلے تیار ہن۔ انہاں آکھیا جو پاکستانی قوم ساڈی طاقت اے اتے اساں قوم دی قوت ہیں، پاکستان دا مستقبل انشاء اللہ ٻہوں روشن اتے تابناک اے، جݙاں حق تے باطل آمݨے سامݨے ہوون تاں فتح ہمیشہ حق دا مقدر ٻݨدی اے، پاکستان کل وی ناقابل تسخیر ہئی اتے انشاء اللہ آوݨ والے وقتاں تئیں ناقابل تسخیر رہسی۔ تقریب اچ ایئر چیف مارشل ظہیر احمد بابر سدھو اتے نیول چیف ایڈمرل نوید اشرف وی شریک تھئے، مسلح افواج دے سربراہاں ولوں یادگار شہداء تے پھلاں دی چادر چڑھائی گئی جݙاں جو تریے مسلح افواج دے چاق و چوبند دستیاں سلامی پیش کیتی۔