وفاقی وزیر داخلہ محسن نقوی دا ماء دی عظمت تے شہداء دیاں ماواں کوں سلام

اسلام آباد۔ 10 مئی(اے پی پی)وفاقی وزیر داخلہ محسن نقوی ماء دی بے مثال محبت، قربانی اتے عظمت کوں سلام پیش کریندے آکھیے جو ماء او عظیم ہستی اے جیہڑی اولاد سانگے ہر ݙکھ، ہر تکلیف اتے ہر آزمائش کوں چپ چپاتیں برداشت کر تے خوشیاں ونݙیندی اے۔ وزارت داخلہ ولوں جاری سنیہے اچ محسن نقوی آکھیا جو ماء دی جھولی ہر ٻال دی پہلی درسگاہ اے جتھوں محبت، اخلاق، صبر اتے انسانیت دے بنیادی اصولاں دی تربیت شروع تھیندی اے۔ انہاں آکھیا جو شہدائے وطن دیاں عظیم ماواں کوں خراج تحسین پیش کرینداں، سلام اے انھاں ماواں کوں جنہاں معرکہ حق سانگے شیر دل پتر پیدا کیتے۔ وزیر داخلہ آکھیا جو ماء دیاں دعاواں زندگی دے اندھاریاں اچ امید دی لات ٻݨ تے رستے سوجھلے کریندن اتے کامیابی دے در کھلیندن۔ دینِ اسلام اچ ماء دا مقام انتہائی بلند اے، ماء دی محبت بے غرض، بے لوث تے خالص ہوندی اے جیہڑی کہیں صلے یا تعریف دی محتاج کائنی۔ انہاں آکھیا جو اڄ میں جیرھے مقام تے ہاں، ایندے اچ میݙی ماء دیاں دعاواں ہمیشہ شامل ہن۔ ضرورت ایں ڳالھ دی اے جو سارے ماء دی خدمت کوں اپݨی اولین ذمہ داری سمجھن۔