میڈیا ورکرز دے حقوق دا تحفظ ساݙی پہلی ترجیح اے، 170 ملازمین کوں برطرف کرݨ آلے ٹی وی چینل دے اشتہارات فوری طور تے بند کر ݙتے ڳئن، عطاء اللہ تارڑ

اسلام آباد۔11 مئی (اے پی پی) وفاقی وزیر اطلاعات و نشریات عطاء اللہ تارڑ آکھیے جو میڈیا ورکرز دے حقوق دا تحفظ ساݙی اولین ترجیح اے، اتحادیاں تے اپوزیشن نال رل تے صحافیاں دے مسئلے حل کیتے ویسن، 170 ملازمین کوں برطرف کرݨ آلے ٹی وی چینل دے اشتہارات فوری طور تے بند کر ݙتے ڳئن۔ قومی اسمبلی اجلاس اچ صحافیاں دے واک آؤٹ تے شازیہ مری ولوں چاتے ڳئے نکات دا جواب ݙیندے وفاقی وزیر اطلاعات و نشریات عطاء اللہ تارڑ آکھیے جو میڈیا ورکرز دا تحفظ ساݙی اولین ترجیح اے، وفاقی تے صوبائی حکومتاں میڈیا چینلز کیتے آسانیاں پیدا کرݨ تے انھاں کوں مالی طور تے مستحکم کرݨ کیتے ݙینھ رات کوششاں کریندیاں پئن۔ انھاں آکھیے جو میڈیا ورکرز دے حقوق دے تحفظ کوں یقینی بݨایا ویسے۔ انھاں آکھیے جو پاکستان براڈ کاسٹنگ ایسوسی ایشن نال صحافیاں دے روزگار دے تحفظ دا معاملہ چاتا ویسی تے صحافیاں دی جاب سکیورٹی تے مراعات دے حوالے نال معاملے طے کیتے ویسن۔ انھاں آکھیے جو میڈیا ورکرز دے مسئلیں دے حل کیتے اقدامات چاتے ویسن، اتحادیاں تے اپوزیشن نال رل تے صحافیاں دے مسئلے حل کیتے ویسن۔ بعد اچ وفاقی وزیر اطلاعات و نشریات عطاء اللہ تارڑ واک آؤٹ کرݨ آلے صحافیاں نال ملاقات کیتی تے انھاں دے مسئلے سݨئے۔ انھاں آکھیے جو برطرف کیتے ونڄݨ آلے صحافیاں دی ہک لسٹ بݨا گھنو، اتھاں ٻہوں سارے ایجھے ادارے ہن جنھاں کوں ہیومن ریسورس دی لوڑھ اے۔ وفاقی وزیر اطلاعات پریس گیلری دے ارکان ولوں واک آؤٹ ختم کرݨ دے بعد ایوان اچ ڳالھ کریندے پریس گیلری دے ممبران دا شکریہ ادا کیتا۔ انھاں آکھیے جو 170 ملازمین کوں برطرف کرݨ آلے چینل دے اشتہارات فی الفور بند کرݙتے ڳئن۔ انھاں مزید آکھیے جو ہک ٹی وی چینل ترائے مہینے توں تنخواہواں ادا کائنی کیتیاں، اوندی انتظامیہ کوں اسلام آباد سݙوایا ڳئے تاں جو انھاں نال معاملے کوں حل کیتا ونڄ سڳے۔ وفاقی وزیر اطلاعات پریس گیلری دے صحافیاں دا واک آؤٹ ختم کراوݨ اچ شازیہ مری، سحر کامران، عابد شیرعلی تے سینیٹر ناصر بٹ دا وی شکریہ ادا کیتا۔