پاورسیکٹراصلاحات اچ عوامی آگاہی تے میڈیا دا کردار اہم اے، وفاقی وزیر اویس خان لغاری

لاہور۔11 مئی (اے پی پی) وفاقی وزیر توانائی اویس احمد خان لغاری آکھیے جو پاور سیکٹر اصلاحات اچ عوامی آگاہی تے میڈیا دا کردار ٻہوں اہم اے، حکومتی پالیسی سازی تے اصلاحات دی درست سمت دے تعین کیتے عوامی سوچ تے صلاح کوں جاݨنا لازمی اے جݙاں جو عوام کوں حقائق توں آگاہ کرݨ نال نہ صرف انھاں دا اعتماد بحال تھیندے بلکہ حکومت کوں موثر فیڈ بیک وی ملدے، میڈیا ایں سلسلے اچ کلیدی کردار ادا کر سڳدے کیوں جو درست تے مصدقہ معلومات عوام تیکر پڄاوݨ ویلھے دی اہم لوڑھ اے ۔ انھاں اے ڳالھ اتھاں لمز (LUMS) انرجی انسٹی ٹیوٹ دے زیر اہتمام میڈیا پرسنز کیتے پاور سیکٹر اصلاحات دے حوالے نال منعقد تھیوݨ آلی تربیتی ورکشاپ نال ویڈیو لنک دے ذریعے خطاب کریندے آکھی ۔ وفاقی وزیر توانائی آکھیے جو صحافیاں کیتے ایں تربیتی ورکشاپ دا اصل مقصد ایہو اے جو انھاں کوں پاور سیکٹر اچ جاری اصلاحات، چیلنجز، حکومتی اقدامات تے مستقبل دی حکمت عملی توں مکمل طور تے آگاہ کیتا ونڄے تاں جو او بہتر انداز اچ عوام تیکر حقائق پڄا سڳن۔ انھاں آکھیے جو توانائی دے شعبے متعلق کئی غلط فہمیاں پائیاں ویندن جنھاں کوں پرے کرݨ کیتے میڈیا دا مثبت تے ذمہ دارانہ کردار لازمی اے۔ اویس لغاری آکھیے جو حکومت پاور سیکٹر اچ دیرپا تے موثر اصلاحات تے کم کریندی پئی اے تے میڈیا کوں انھاں سارے اقدامات توں باخبر رکھݨ ضروری اے تاں جو صحافی حقائق تے اعداد و شمار دی بنیاد تے عوامی بحث کوں اڳوں ودھا سڳن۔ انھاں آکھیے جے عوام کوں صحیح معلومات ݙتیاں ونڄن تاں نہ صرف اعتماد اچ ودھارا ہوسی بلکہ پالیسی سازی اچ وی بہتری آسی۔ انھاں تربیتی ورکشاپ دے انعقاد تے لمز انرجی انسٹی ٹیوٹ دا شکریہ ادا کریندے آکھیے جو ایجھے پروگرام میڈیا تے پالیسی ساز اداریں وچال بہتر رابطے تے سمجھ ٻُجھ پیدا کرݨ اچ مددگار ثابت تھیندن۔ ہک سوال دے جواب اچ وفاقی وزیر آکھیے جو ملک اچ تقریباً ترائے کروڑ 40 لکھ بجلی صارفین موجود ہن جنھاں اچوں اکثریت سنگل فیز میٹر استعمال کریندی اے۔ انھاں آکھیے جو اوور بلنگ دے مسئلیں تے قابو پاوݨ کیتے ڈی فیکٹو میٹرز دی تبدیلی سودھے مختلف اقدامات کیتے ویندے پئن تاں جو صارفین کوں درست ٻلنگ دی سہولت مل سڳے۔ سولرائزیشن تے نیٹ میٹرنگ متعلق سوال دے جواب اچ اویس لغاری آکھیے جو مستقبل اچ آئی پی پیز (IPPs) دا کردار محدود تھی ویندا رہسی جݙاں جو موجودہ آئی پی پیز اچوں اکثر معاہدیں تے نظرثانی کیتی ونڄ چکی اے۔ انھاں واضح کیتا جو سولر نیٹ میٹرنگ اچ کمی یا اضافے دا آئی پی پیز نال کوئی تعلق کائنی۔ انھاں ݙسایا جو نویں سولر نیٹ میٹرنگ صارفین اچوں تقریباً 22 ہزار درخواستاں اچوں 8 ہزار صرف نیٹ میٹرنگ متعلق ہن۔ انھاں آکھیے جو بیٹری سٹوریج ٹیکنالوجی دی طرف منتقل تھیوݨ اچ کوئی ہرج کائنی بلکہ ایندے نال قومی گرڈ تے ٻوجھ گھٹ تھیسی تے ایندا سدھا فیدہ عوام کوں پُڄسی۔ وفاقی وزیر آکھیے جو ݙینھ دے اوقات اچ بجلی نسبتاً سستی ہوسی جݙاں جو بیٹری ٹیکنالوجی تے سرمایہ کاری مستقبل اچ ٻہوں فیدہ مند ثابت تھی سڳدی اے۔ انھاں آکھیے جو توانائی دے جدید نظام اچ صارفین کوں زیادہ خودمختاری تے بہتر سہولتاں میسر آسن۔ لیسکو اچ اوور بلنگ دے متعلق سوال دے جواب اچ انھاں آکھیے جو صارفین دی شکایات دے ازالے کیتے باقاعدہ ادارہ جاتی نظام موجود اے۔ انھاں واضح کیتا جو بورڈز اچ کہیں سیاسی بندے یا رشتہ دار کوں شامل کائنی کیتا ڳیا بلکہ سارے فیصلے شواہد تے میرٹ دی بنیاد تے کیتے ویندن۔ اویس لغاری ایں عزم دا اظہار کیتا جو صارفین دی دادرسی تے انھاں دے مسئلیں دا فوری حل حکومت دی پہلی ترجیح اے تے بجلی دے شعبے اچ شفافیت، احتساب تے بہتری کیتے سارے ممکنہ اقدامات جاری رکھئے ویسن۔