قومی اسمبلی دی مسلح افواج دے بہادرانہ تے پیشہ ورانہ ردعمل کوں خراجِ تحسین، قرارداد متفقہ طور تے منظور

اسلام آباد۔11 مئی (اے پی پی) قومی اسمبلی 10 مئی 2025 کوں بھارتی جارحیت دے خلاف پاکستان دی مسلح افواج دے بہادرانہ تے پیشہ ورانہ ردعمل کوں خراجِ تحسین پیش کریندے ہک تاریخی قرارداد متفقہ طور تے منظور کر ڳھدی اے جیندے اچ آکھیا ڳئے جو حق دے معرکے اچ دشمن دی جارحیت دا منہ بھن جواب ݙتا ڳیا جݙاں جو بھارت کوں خبردار کیتا ڳیا جو پاکستان دے امن پسند رویے کوں کمزوری نہ سمجھیا ونڄے، پاکستان آپݨی خود مختاری تے علاقائی سالمیت دے خلاف کہیں وی جارحیت دا بھرپور تے فیصلہ کن جواب ݙیسی۔ قومی اسمبلی اچ وفاقی وزیر قانون و انصاف اعظم نذیر تارڑ قرارداد ایوان اچ پیش کیتی۔ قرارداد اچ آکھیا ڳئے جو اے ایوان بھارت دی بلا اشتعال جارحیت دی پرزور مذمت کریندے پاکستان دی مسلح افواج دی بے مثال مہارت، تیاری تے جرأت مندانہ جواب کوں قومی فخر قرار ݙیندے۔ قرارداد اچ آکھیا ڳئے جو 22 اپریل 2025 کوں بھارت دے غیر قانونی طور تے زیرِ قبضہ جموں و کشمیر دے علاقے پہلگام اچ تھیوݨ آلے دہشت گردی دے واقعے دے بعد بھارتی حکومت تے اوندے میڈیا بغیر کہیں ثبوت دے پاکستان تے الزامات لاتے جݙاں جو پاکستان ایں واقعے دی فوری مذمت کیتی۔ ایوان وزیراعظم دی طرفوں شفاف تحقیقات اچ تعاون دی پیشکش دے باوجود بھارت دے 6 مئی 2025 دے بلا اشتعال فضائی حملے دی شدید مذمت کیتی جیندے اچ نشوم شہریاں کوں نشانہ بݨایا ڳیا۔ قرارداد اچ آکھیا ڳئے جو پاکستان دی مسلح افواج کوں زبردست خراجِ تحسین پیش کریندوں ، وزیراعظم محمد شہباز شریف تے چیف آف ڈیفنس فورسز فیلڈ مارشل سید عاصم منیر دی قیادت اچ 10 مئی 2025 کوں شروع کیتے ڳئے “آپریشن بنیانٌ مرصوص” دی تعریف کریندے قرارداد اچ آکھیا ڳئے جو ایں کارروائی اچ دشمن دی جارحیت دا منہ بھن جواب ݙتا ڳیا۔ پاکستان فضائیہ دی جرأت تے مہارت دی تعریف کریندے قرارداد اچ آکھیا ڳیا جو فضائیہ وݙی تکھے فضائی برتری حاصل کریندے بھارتی فضائیہ دے کئی طیارے، بشمول جدید رافیل طیارے مار ڈھائے۔ پاکستان دے JF-17 تھنڈر طیاریں بھارت دے جدید ترین S-400 دفاعی نظام کوں وی تباہ کرݙتا۔ ایندے علاوہ پاکستان دی بری، بحری تے فضائی افواج دے سارے افسراں، جواناں، سپاہیاں، ایئرمین تے سیلرز دی بہادری تے قربانیاں کوں خراجِ تحسین پیش کیتا ڳیا۔ قرارداد اچ آکھیا ڳیا جو آپریشن دے دوران دشمن دے بریگیڈ ہیڈ کوارٹر، فضائی اݙیں تے براہموس میزائل تنصیبات کوں موثر طریقے نال نشانہ بݨایا ڳیا۔ پاکستان بحریہ دی حکمتِ عملی تے تیاری دی وی تعریف کیتی ڳئی جیں پاروں دشمن کوں پچھوں ہٹݨا پیا۔ شہداء دی قربانیاں کوں یاد کریندے ایوان زمینی، فضائی، بحری تے سائبر محاذاں تے دشمن کوں عبرتناک شکست ݙیوݨ آلے جواناں کوں خراجِ عقیدت پیش کیتا۔ سائبر ماہرین دی خدمات دی وی تعریف کیتی ڳئی ۔ قرارداد اچ بھارت کوں صاف لفظاں اچ خبردار کیتا ڳیا جو پاکستان دے امن پسند رویے کوں کمزوری نہ سمجھیا ونڄے، پاکستان دی خودمختاری تے علاقائی سالمیت دے خلاف کہیں وی جارحیت دا بھرپور تے فیصلہ کن جواب ݙتا ویسے۔ قرارداد اچ ایوان ایں عزم دا اعادہ کیتا جو پوری پاکستانی قوم آپݨی مسلح افواج دے شانہ بشانہ ملک دی سلامتی، نظریاتی سرحداں تے خودمختاری دے دفاع کیتے ہر قربانی ݙیوݨ کیتے تیار اے۔