نائب وزیراعظم اسحاق ڈار نال مشرقِ وسطیٰ تنازع کیتے اقوامِ متحدہ دے سیکرٹری جنرل دے ذاتی نمائندے دی ملاقات

اسلام آباد۔11 مئی (اے پی پی) نائب وزیراعظم تے وزیر خارجہ سینیٹر محمد اسحاق ڈار نال مشرقِ وسطیٰ تنازع کیتے اقوامِ متحدہ دے سیکرٹری جنرل دے ذاتی نمائندے جین آرنالٹ ملاقات کیتی۔ دفتر خارجہ توں جاری تھیوݨ آلے بیان موجب آرنالٹ اقوامِ متحدہ دے سیکرٹری جنرل دی طرفوں خطے اچ امن و استحکام کیتے پاکستان دی سفارتی کوششاں دی تعریف کریندے وݙی قدر دانی دا اظہار کیتا تے ایں سلسلے اچ اقوامِ متحدہ دی مسلسل حمایت دا اعادہ کیتا۔ نائب وزیراعظم تے وزیرخارجہ ذاتی نمائندے دے نال خطے دی تازہ صورتحال تے ڳالھ مہاڑ کیتی تے مختلف فریقاں دے نال پاکستان دی جاری سفارتی کوششاں تے مسلسل رابطیں تے روشنی پاتی۔ انھاں اقوامِ متحدہ دے سیکرٹری جنرل دی پاکستان کیتے ودھ ساری خدمات تے مستقل حمایت تے دلی شکریہ وی ادا کیتا۔