صدرمملکت دا دہشت گردی دا خطرہ ناکام بݨاوݨ آلے بہادر شہری لیاقت کوں خراج عقیدت

اسلام آباد۔ 12 مئی (اے پی پی) صدر مملکت آصف علی زرداری جنڈ تے خوشحال گڑھ پل دے نیڑے دہشت گردی دا خطرہ ناکام بݨاوݨ دے دوران جان قربان کرݨ آلے بہادر شہری لیاقت کوں خراج عقیدت پیش کیتے۔ایوان صدر دے پریس ونگ توں جاری بیان موجب صدر مملکت آکھیا شہید لیاقت جیھے بہادر شہری دہشت گردی دے خلاف قومی ہمت، حب الوطنی تے اجتماعی شعور دی روشن مثال ہن۔ انہاں آکھیا دہشت گردی دے خاتمے سانڳے پوری قوم اپݨی سکیورٹی فورسز دے نال ھک مٹھ تھی تے کھڑی اے۔ صدر آصف علی زرداری آکھیا ٻاہرلی مداخلت پاروں تھیوݨ آلی دہشت گردی دے خلاف جنگ جاری رہسی۔ صدر مملکت خاص طور تے گورنر پنجاب سردار سلیم حیدر خان تے وفاقی وزیرداخلہ محسن نقوی کوں ہدایت کیتی جو او شہید لیاقت دے گھر آلیں کوں پوری قوم ولوں یکجہتی دا سنھیا پڄاون۔